Kalaallit aningaasassaat nalilersoqqeqquaat

Kalaallit aningaasassaat pillugit isummersuutit suli naammassineqanngillat. Statsministerip Naalakkersuisullu siulittaasuata isumassarsiaat akueriinnarnagu, Naalakkersusuni ilaasortat inatsisissatut siunnersuumik akuersinertik nalilersoqqittariaqaraat, Folketingimi nunatsinnut tunngassuteqartumik ataatsimiisitaliaat isumaqarpoq.

Suliaq ajornanngitsutut isikkoqaraluarpoq, nunatsinnilu nuannaarutaasussaagaluarluni.

Kalaallit nunaannili immikkut aningaasaqalernissaq assortuussutaalerpoq. Anigaasassat pillugit Inatsisartuni ilaasortat isumaqatigiinngilerput, aammalu Kalaallit aningaasassaasa atuutilernissaat folketingimi amerlanerussuteqartunit isumaqatigineqarsimagaluartoq, isumaqataasut ikinnerussuteqalersimasutut isikkoqarput.

Kalaallit aningaasassaanut tunngatillugu suliaq, inatsisartunit eqqartorneqaqqeqqullugu, Nunatsinnut tunngassuteqartuni folketingimi ataatsimiisitaliap, suliassanngorteqeqquaa. Ataatsimiisitaliaq isumaqarpoq, Kalaallit aningaasassaasa naalagaaffeqatigiinnerup iluani atorneqarsinnaannginnissaat ajoqutaasoq.

Kalaallit aningaasassaasa taamaallaat nunatsinni atorneqarsinnaanissaat ajornartorsiutitut isigineqarpoq, taamaattoqarneralu juullinngitsiartoq, Danmarkimi aningaasaqarnermut suliffissaqarnermullu ministerip Bendt Bendtsenip nationalbankillu uppernarsareerpaat. Naalakkersuisut isumaat allanngorsimassannginnersoq, ataatsimiisitaliap nalilersoqqeqquaa.

Ukiup ataatsip matuma siorna Statsministeri Anders Fogh Rasmussen Hans Enoksen-imut siunnersuutigaa, Kalaallit nunaata nammineq aningaasaqalernissaa. Aningaasallu nutaassat pillugit isummamik allanngortoqassanersoq, Naalakkersuisut kisimik apeqqutaalerput.

Kalaallit aningaasaat pillugit inatsissatut siunnersuut ukioq manna januaarip aallaqqaataaniit atuutilersussaagaluarpoq, februaarilli aallaqqaataanut tamanna kinguartinneqarpoq, pilersaarullu malillugu aningaasat nutaat 2008-mi atuutilersussaagaluarput.