Kalaallit aningaasassaat kinguaattuussagunarput
Eqqumiitsuliortoq aamma Nationalbanken aningaasat pillugit sakkortuumik akerleriissuteqalersimapput, Naja Abelsenillu titartakkani kingusinnerpaamik aqagu tunniutinngippagit isumaqatigiissutip atorunnaarsinneqarnissaa aningaaserivissuup sioorasaarutigisimavaa.
- Piffissaq eqqorlugu titartakkat tunniussinnaanngilakka, tassami saniatigut aningaasarsiortariaqarama, Naja Abelsen Atuagalliutinut oqarpoq.
Aningaasanit pappiaranit tallimaasunit ataaseq 100.000 koruuninik akissarsissutigisarpara, aningaasallu ataatsip suliarinera ukiup ataatsip missaanik sivisussuseqartarpoq, ukiumullu 100.000 koruunit inuussutigisinnaanngilakka, Naja Abelsen marlunnik meeralik kisimiittuusoq oqarpoq.
Nationalbankip pisortaata Torben Nielsenip Atuagalliutinut uppernarsarpaa, Naja Abelsenimut isumaqatigiissut taamaatiinnartariaqalersinnaasoq. Aningaasanik suliaqarnini aallussinnaajumallugu eqqumiitsuliortoq tapiiffigineqarnissaminik qinnuteqarsimagaluarpoq.
