Kalaallit Nunaanni inuiaqatigiit akornanni aningaasaqarneq siumut ingerlavoq, tamannalu niuertarfiit malugisinnaalluarpaat, inuit akisuunik juullimut tunissutissanik niuerniartarmata.
Nuummi pisiniarfiit ilaanni Nota Bene-mi pisiniarfiup pisortaa Kenneth Kleist oqaloqatigaarput:
- Niuerniat amerlanerit mobiltelefon-inik pisisarput, taava aamma cd dvd-iilu aamma tunisaalluarput. Aamma fladskærmit tunisaalluarput. Malunnarpoq inuit aningaasaateqarnerunerat,Nuummi pisiniarfiit ilaanni Nota Bene-mi pisiniarfiup pisortaa Kenneth Kleist oqarpoq.
Nuummi pinnguaarniarfiit ilaanni Legeland-imi piginnittoq Ane Marie Hviid Kristensen oqarpoq, ukioq manna tunisineruneq aamma malunnartoq:
- Nukappiaqqanut Spiderman B-Daman-illu tunissutissatut tuninerpaavagut. Niviarsiaqqanut inuusarujussuit. Siorna aatsaat maanga uteraluarlunga ilimagaara ukioq manna tunisaqarnerusimassasugut.
Taama oqarpoq Legeland-ip pisortaa Ane Marie Hviid Kristensen.
Suliffillit suliffiutillillu malugisimavaat akissarsiat qaffassimasut. Ukioq 2004-mi akissarsiat 2 procentimik qaffassimapput, inuillu aningaasaateqarneruleriartornerat aappaagu taamaaginnassasoq Nunatsinni naatsorsueqqissaartarfiup ilimagaa.