Kalaallit aningaasaat avataani atorneqarsinnaassanerpat?

Kalaallit aningaasaat Danmarkimi Savalimmiunilu atorneqarsinnaasariaqarput, taama isumaqarpoq kalaallinut tunngassuteqartunut Folketingimi ataatsimiititaliaq.

Tamanna tunngavigalugu Folketingimi aningaasaqarnermut inuussutissarsiornermullu ministerip Bendt Bendtsenip kiisalu Nationalbankip maanna misissugaritippaat aningaasat kalaallit titartagaannik assiliartallit Naalagaaffeqatigiinnermi atorneqaleraluarpata sutigut ajoqutitaqaratarsinnaanerat.

Bendt Bendtsenillu saqqummiuteqqammerpaa inatsisissatut siunnersuusiorsimallutik kalaallit aningaasarilerumaagaat taamaallaat Kalaallit Nunaannaani atorneqarsinnaasariaqartut.

Taamalu Folketingimi tallimanngormat tamatuma aappassaaneerneqarnerani siunnersuut tamanna ataatsimiititaliamut kalaallinut tunngassuteqartunut suliaqartartumut uterteqqinneqarpoq.

Maannalu ataatsimiititaliami tassani ilaasortat inatsisissamik siunnersuutip taassuma allanngortinnissaa misissugarinialerpaat, taamaalilluni siunissami kalaallit aningaasaat danskit savalimmiullu pisiniarfiini aamma atorneqarsinnaalerniassammat. Tassungalu ilutigitillugu Savalimmiut aningaasaannut inatsit maanna pioreersoq assingusumik allanngortinniarneqalersaarportaaq.

Ataatsimiititaliaq taanna aqagu ataatsimiissaaq, taakku oqaluuserisussaavaat inatsisissap pingajussaaneerneqannginnerani inatsisissamut ilassutissap qanoq ilaneqarsinnaanera.

Qularnarporli tallimanngorneq nallertinnagu angumeqqussinnaanersoq tassami tallimanngorpat Folketingimi ilaasortat juullimut feeriarratilertussaapput.

Siunnersuut angumeqqutissanngikkaluarpat apeqqutinngussaaq kalaallit aningaasassaata atuutilernissaat kinguartinneqassanersoq, tassami isumaaqqaaraluarpoq aningaasat 2008-mi atuutilersinneqassasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat