Misissuinerup uissuumminartup inernera nakorsaatit pillugit atuagassiami Human Reproduktionimi saqqummersinneqarmat, takuneqarsinnaavoq, angutit kalaallit anisuuat, nunat Europameersut angutitaasa anisuuannut naleqqiullugu PCB-p toqunartuanik akoqannginnerusoq.
Angutit 700-it Sverigimiit, Polenimiit Ukrainimiit aamma Kalaallit Nunaanneersut anisuuminni PCB-mik qanoq akoqartiginersut misissuivigineqarsimapput.
Misissuinerup inernera uissuumminartoq tassaavoq, akuutissap taassuma sinneri annertuut pigineqaraluartut, aamma kalaallit angutitaanni, angutit kalaallit 193-it misissorneqarsimasut akornanni, angutit allaneersut anisuuinut naleqqiullugit akuutissamik taassuminnga annikinnerusumik akoqartut.
Dronning Ingridip Nuummi napparsimmavissuani nakorsiartarfimmi nakorsaaneq, Henning Sloth Pedersen, nunatsinni misissuisuusimavoq, nakorsaanermullu apeqqutigaarput, nutaarsiassaq taanna pingaarutilittut oqaatigisinnaannginneripput, akivorlu:
- Aap, taama isumaqarpunga.
Mingutsitsineq Kalaallit Nunaanni annertugaluaqisoq – kalaallillu eqqugaasaraluaqisut, angutit anisuuannut ajoqutaasimanngilaq.
Mingutsitsineq kalaaliminertortarnitsinnit pissarsiarisarparput, kisianni kalaallit kalaalinertortannginnissaannik oqarfigisariaqanngilavut.
Killormorluinnaq iliorsinnaavugut. Tamakkumi nerisavut mingutsinneqannginnissatsinnut iluaqutaalluinnarput, Henning Sloth Pedersen oqarpoq.
Nerisat saniatigut inuttut sananeqaatit anisuup pitsaassusianut aamma aalajangeeqataasartut paasineqarpoq.
Kalaallit timimikkut mingutsinneqarsimanerat allanut naleqqiulluni annertunerugaluartoq mingutsinneqarneq anisuumut sunniuteqanngitsoq paasisanut ilaavoq.
Oqaatigineqarpoq kalaalimerngit PCB-mut akiuussutissartaqartut.
Misissuineq ukiuni pingasuni affarnilu ingerlanneqarsimavoq.