ISLAND GAMES Kalaallit angusaat tulluusimaarnartut
GIF-ip siulittaasuata kalaallit Island Gamesimi angusarissaarnerat naatsorsuutigisimanngikkaluarpaa.
- Naatsorsuutigisatsinniit pitsaanerusumik angusaqarpugut, Nuka Kleemann GIF-ip siulersuisui sinnerlugit KNR-imut oqarpoq, nangillunilu;
- Timersortartut angusaqarluarsimanerat tulluusimaarnartorujussuuvoq. Timersortartut siulianut sanilliullugit takutitsilluarnerunerat unammilluarnerallu malunnartorujussuuvoq. Kalaallit tamattaalluta tulluusimaarutigisariaqarpagut.
Ukiut marluk matuma siorna kalaallit Island Gamesimut peqataammata ataasiinnarmik ujaminnattoqarpoq, ukioq mannali tallimanik sølvinnatoqarpoq ataatsimillu guultinnattoqarluni. Tamannalu imminut upperinermik ilaatigut aallaaveqartoq Kleemann isumaqarpoq.
- Tassuuna takusinnaavarput kalaallit timersortartui piareersarluarsimallutik, sungiusarluarsimallutik anguniagaqarlutillu unammiartortarnerat ilorraap tungaanut aallarsimasoq.
- Ullut tamaasa sungiusarnikkut, imminut upperinikkut anguniagaqarnikkut imminullu piumaffiginikkut angusarissaartoqarsinnaasoq takutippaat, Kleemann oqarpoq.
Taassuma aamma oqaatigaa timersortartortagut ajugaarusussuseqarlutik unammisarnermikkut tupaallatsitsisut. Assersuutigalugu arsaattartut sungiusartarnerat aalaakkaasumik ingerlasimanerata kinguneranik angusaat pitsanngoriartut.
Uku ujaminnapput:
Nerrivimmi arsaarartartut pingasunik ujamminnapput. Iligiikkaarnermi sølv pissarsiarivaat, tassanilu iligiikkaarnermi peqataasut ukuupput: Ivik Nielsen, Aqqalu Nielsen, Poul-Jørgen Petersen , Karlinannguaq Lundblad, Rosa-Marie Petersen, Melissa Larsen.
Angutini marlukkaarnermi Ivik Nielsen aamma Aqqalu Nielsen guultinnapput
Angutini ataasiakkaarnermi Ivik Nielsen sølvinnalluni.
Sulorartartut marlunnik ujaminnapput:
Angutini marlukkaarnermi Jens Frederik Nielsen aamma Bror Madsen sølvinnapput.
Arnani ataasikkaarnermi Sara Lindskov-Jakobsen sølvinnalluni.
Angutit isikkammik arsaattartui sølvinnapput
AAMMA ATUARUK Ukiuni arlalinni ineriartortitsinerup inerneri takusinnaalerpagut
AAMMA ATUARUK Nerrivimmi arsaarartartut guultinnanngitsoortut
