Kalaallit angerlarsimaffeqanngitsut ataatsimoorusunnerusarput
Kalaallit Københavnimi angerlarsimaffeqanngitsut Københavnip kommunianit inimik neqeroorfigineqaraangamik tamatuminnga qujarutiginnippallaartarsimanngillat. Ataatsimoorusunnerusarput imminnullu inoroorsaaqatigiikkusunnerusarlutik, tamannalu angerlarsimaffeqannginnermut peqqutaaqataasoq, kalaallit angerlarsimaffeqanngitsut 137-t misissuivigineqarneranit paasinarsivoq.
- Kalaallit angerlarsimaffeqanngitsut ilisarnaatigisarpaat, ataatsimoorusunnerunertik akunnerminnilu tukkusaqattaartarnertik. Ininik neqeroorfigitikkaluarlutik piumaneq ajornarannut peqqutaavoq inini neqeroorutaasuni pulaartoqarneq inerteqqutaammat, taama oqarpoq Københavnip universitetiani kulturi pillugu misissueqqissaarnermut etnologi-tut ilinniarsimasoq Nanna Folke Olsen. Etnologitut ilinniagalik alla Signe Bosgaard peqatigalugu marluullutik nalunaarusiorput taaguuserlugu; ”allorialaarneq allanngornermik pilersitsisarpoq”, nalunaarusiarlu taanna kalaallit Danmarkimi angerlarsimaffeqanngitsut pillugit sammiveqartinneqarpoq.
Kalaallit angerlarsimaffeqanngitsut 137-t misissuinermi tunngavigineqartut inuttut ajornartorsiuteqartuupput; namminerisaminnik angerlarsimaffeqaratilluunniit namminerisaminnik angerlarsimaffeqarsinnaanngitsuupput. Taakkulu ineqarnikkut inuttullu ajornartorsiuteqarnermikkut ikiorserneqarnissaminnik pisariaqartitsisuupput. Misissuinerlu naapertorlugu kalaallit Københavnimi angerlarsimaffeqanngitsut pisariaqartippaat kalaaleqatiminnik ataatsimooqateqartuarnissartik. Taamatuttaaq inoroorsaaqatigiinneq taakku akornanni ileqqooqaaq, arlaat angerlarsimaffeqarpat taava ilaminnut matu ammatittarpaat. Taamaaliorneq ajunngikkaluarluni aappaatigut aamma ajornartorsiortitsilersartoq, Nanna Folke Olsen nassuiaavoq.
- Inimiit qimaguttariaqalernermut marlunnik peqquteqarsinnaavoq, kisimiillutik sulerinatik isersimarusaarnissartik sapilertarpaat, imaluunniit kammalaatitik isaatittarpaat tassami ileqqortik taanna pigiliussimasaramikku. Taava tassa piffissaq sivisunngitsoq qaangiukkaangat anisitaasarput, inissiamimi inuit allarpassuit aamma najugaqarmata, taamaalillutillu tassa inissaaruttarput, Nanna Folke Olsen oqarpoq.
Taanna isumaqarpoq kalaallit angerlarsimaffeqanngitsut ikiorneqassappata nutaamik eqqarsartoqartariaqalersoq.
- Inerujussuarmik ataatsimoorfigisinnaasaannik ineqartinneqartariaqarput allanut taakkualu ataatsimoorusunnerannut akornutaanngitsumik, taama oqarpoq Nanna Folke Olsen.
Periarfissat aamma ilaattut tikkuarneqarpoq svenskit periusaat ”avancementshus”-imik taaneqartartoq. Tassa ineqartut pisariaqartitsinertik naapertorlugu inissiarsuup iluani ininiit ininut nooqattaarsinnaatillugit pisinnaatitaaffeqarsinnaasut, taamalu aningaasartuuteqarnissamut akisussaaffeqarnermik aamma misigitinneqarlutik.
