Kalaallit angerlarsimaffeqanngitsut Aalborgimi napasuliamik kusassaaqataasut
Sisamanngormallu atoqqaartitsisoqarmat, illoqarfimmi Kofoeds Skolemi atuisut, kalaalerpaaluit, kusassaanermut peqataasimasut atoqqaartitsinermi peqataapput.
- Qalipaaqataalluni assut nuannerpoq. Nunatsinni qalipaalaartarnikuuvunga, maqaasilaartarpara, ingammik silaannarinnera. Qaqqanik, immamik, qilammik sikumillu qalipaavunga, kalaallit ilaat, Arne Schmidt, aviisimut Nordjyskemut taama oqarpoq.
Naammassiniarnissaalu imaannaasimanngilaq.
- Suliniutip aallartinnerani qalipaarusuttunik pissarsiniarnerput ajornakusoorsimavoq, Kofoeds Skolep pisortaa Helle Rønn Christensen taama oqarpoq.
- Ittoornerulli iperariartornera peqatigalugu, pingaartumik kalaallit suliniummut peqataarusulerput. Aamma suliniummik taama ittumik pilersitsoqarsimanera nuannaarutigalugu Kofoeds Skolep pisortaata oqaatigaa.
Pingaartumik kalaallit Kildeparkenimi toqqissisimanngitsitsisarnerat napasuliap imiisiviup kusassarneqarneranut pissutaavoq.
Sumiiffimmik piginneqataasutut misigitilernerisigut pitsaanerusumut saatsititsiniarnissaq siunertaavoq, taamaaliornikkut toqqissisimanngittoqarnera qaangerumallugu.
- Sumiiffimmi sammisassaqartitsinerunikkut suli amerlanerusut tassunga orniguttalissapput, Aalborg Kongres & Kultur Centerimi pisortaq, Ernst Trillingsgaard, aviisimut Nordjyskemut taama oqarpoq.