Kalaallit amiutaat pillugit qallunaat tapersersuipput
Jørgensen siornatigut Europaparlamentimi ilaasortaanermini puisit amiisa EU-mut eqquteqqusaannginnerat tapersersoraluariarlugu, maannakkut Thorningip naalakkersuisunngortimmani puisit amiisa nioqqutaanissaat tapersersulerpaa.
-Puisit amiinit tunisassiat EU-mit killilersorneqarnerat Kalaallit Nunaannut malunnaatilimmik sunniuteqartussaavoq. EU akerlilersorniarlugu Kalaallit Nunaanni Danmarkimilu naalakkersuisut qanimut suleqatigiinnerat ingerlaqqittariaqarpoq. Tamatumunnga atatillugu akisussaaffigisannut attuumassutillit tamaasa tamatigut tapersersorpakka, Dan Jørgensen nassuiaavoq.
Tamanna Doris Jakobsenip nuannaarutigaa, tamannali naammaginagu. Suli iluarsaasoqarsinnaavoq, Siumup Folketingimi ilaasortaatitaa oqarpoq.
-Dan Jørgensenip inuussutissat pillugit ministerinngornerani pissutsit allannguuteqanngitsut tusarlugu nuannaajallannaqaaq. Kalaallillit piniartut maannakkorpiaq ajornartorsiornerannut paasinninnerusinnaaneq ujartorpara. Puisit amii pillugit annertunerusumik EU-p killilersuinissaa ajornarluinnanngikkuni ajunakusuussaaq. Iliuutsit sunniuteqapilunnerannit annaasat annikillisarniarlugit suliannertuumik iliuuseqartoqartariaqarpoq. Ministerip akissutaani suliniutigineqarsinnaasut allat eqqaaneqanngimmata aaqqiissutissanik ujartuinitsinni ministeri atassuteqarfigiuassavara, Doris Jakobsen nassuiaavoq.
