Kalaallit amerikap nunavittaani unamminerni bronzennapput

Kalaallit angutit assammik arsartartut Amerikap nunavittaani assammik arsarluni pissartanngorniunnerni ippassaq bronzinnallutik normu 3-nngorput, taamaalillutillu nunarsuarmi pissartanngorniunnissanut anngullutik.

Kalaallit angutit Amerikamiunut ippassaq unamminerat assut naligiissimavoq, immikkoortumi siullermi kalaallit 14-inik isertaqartut amerikamiut 13-raarsimapput, kalaallilli naggataagut 30-29-imik ajuullutik.

Kalaallit unammiartuisa sungiusaasuat Jakob Andreassen oqaluttuarpoq kalaallit Amerikamiullu ippassaq unammineranni kalaallit isiginnaartunit 5000-iusunit assut illersorneqarsimasut.

Jakob Andreassen oqarpoq kalaallit unammisaqattaarnerni suleqatigiilluarsimanerat taamaalilluni kinguneqarluartoq unammiallu massakkut assut qasusimasut tamarmilli ajoratik nuannaaqisut.

Kalaallit nunarsuarmi pissartanngorniunnissamut annguttut qaammatit arfinillit qaangiuppata Tysklandiliassapput, tassani januaarip 17-ianiit februaarip sisamaata tungaanut nunarsuarmi pissartanngorniullutik unammeqataassallutik.

Kalaallit unammisartui nunatsinni najugaqartut sapaatip akunnerata tulliani, juunip 13-ianni, 14-iannilu nunatsinnut tikissapput.