Kalaallit akuersiteqqaartinnagit Pituffimmi nutaamik radariliisoqassanngilaq
Doris Jakobsenip Wammen, danskit naalakkersuisui sinnerlugit uppernarsaqquaa amerikamiut naalakkersuisui danskit kalaallillu naalakkersuisui akuersiteqqaarnagit Pituffimmi radarimik annertusaasinnaanngitsut.
-Missilinut illersuutissamut periusissamut nutaamut atatillugu Pituffimmi radarip annertusaavigineqarnissaanik pisariaqartitsisoqarnera saqqummiunneqarmat, taamani illersornissamut ministeriusumut Nick Hækkerupimut, Amerikap Københavnimi aallartitaqarfianut amerikamiullu illersornissamut ministeriannut suliaq pillugu apeqquteqaateqarpunga. Amerikamiut nutaamik periussisiornerminnut atatillugu sakkutooqarfimmi allanngortiterisoqarnissaa pillugu arlaannaataluunniit erseqqissumik akissuteqarfigisinnaasimanngilaat, Doris Jakobsen oqarpoq.
Igalikumi isumaqatigiissummi artikel 3-mi imm. C innersuussutigaa. Taassuma oqaasertai imaapput:
Illersornissaq pillugu isumaqatigiissut isumaqatigiissummi matumani aamma Merorandum of Understanding marsip 13-iani 1991-imeersumi allanngortinneqartoq naapertorlugu, aammalu Illuatungeriit akornanni isumaqatigiissutinut aaqqissuussinernullu attuumassuteqartunut allanut tunngatillugu, Amerikami Naalagaaffeqatigiit Kalaallit Nunaanni sakkutooqarnikkut ingerlataasa atortuisalu arlaatigut malunnaatilimmik allannguuteqartinneqassappata Amerikami Naalagaaffiit Peqatigiit naalakkersuisuisa Kunngeqarfiup Danmarkip naalakkersuisui Kalaallit Nunaata naalakkersuisui ilanngullugit isumasiorlugillu paasiteqqaassavaat.
-Pituffimmi radarip sakkutooqarfimmilu atortut annertuumik allanngortiteriffigineqarnissaat Igalikumi isumaqatigiissutip immikkoortua 3cp ataaniinnersut aammalu aalajangiiniarnermi Kalaallit Nunaata Danmarkillu peqataatinneqarnissaat uppernarsartikkusuppara. Nunatsinni sunik pilersaaruteqartoqarnersoq sunik pisoqannginnerani nammineerluta nalilersuisinnaasariaqarparput, Doris Jakobsen oqarpoq.
