Kalaallit ajunngitsumik pineqarput
Kalaallit nunasiaataajunnaarluni naalagaaffiup Danmarkip ataani inissisimalernerani, Nunatsinni innuttaasut ajunngitsumik pineqarsimasut, nalunaarusiaq Hans Enoksen-imit suliareqquneqarsimasoq taama inerniliivoq. Nalunaarusiallu inerniliinera piffissami qaninnermi eqqartorneqangaatsiarnissaa ilimagineqarsinnaavoq.
Kalaallit Nunaata nunasiaataasimaneranut taassumalu kingorna nunasiaataajunnaarluni nalaagaaffiup ataaniilersimaneranut tunngatillugu nalunaarusiaq, quppernernik 378-nik qupperneqarpoq. Nalunaarusiamillu suliarinnittuupput Dansk Institut for Internationale Studier.
Kalaallit nunaata nunasiaataanerani ukiuni 1945-miit 1954-ip tungaanut pisimasut, nunasiaataanerullu peeriartorneqarsimanera, ullutsinni piffissami sivisuumi oqallisigineqarluartartut ilagaat. Taamaammat Naalakkersuisut siulittaasuata Hans Enoksen-ip nalunaarusiamik sanasoqarnissaa kissaatigisimavaa. Oqallinnerni ilaatigut Kalaallit Nunaata nunasiaataanermiit peernissaanut atatillugu, Danmarkip kalaallinik uukapaatitsisimasinnaanera oqallisigineqartarpoq. Taamanikkut 1953-imi kalaallit marluinnarnik toqqagassinneqarlutik, tassa nunasiaataaginnarsinnaaneq imaluunniit Naalagaaffiup ataanut inissisimalernissamik toqqagassaqarnissaq kalaallinut periarfissaasimavoq.
Kalaallit Nunaat namminersornerulerluni inissisimalersinnaanermik taamanikkut Danmarkip periarfississimasinnaagaluaraa ilaatigut Atlatikup Avannaani Suleqatigiit oqallittarnerini saqqummertarpoq.
Nalunaarusiamili allaaserineqarpoq, kalaallit tungaanniit, taamanikkut namminersornerulernissamik kissaateqartoqarsimanngitsoq.
Misissuinermi nalunaarusiami allaaserineqartumi oqaatigineqarpoq, paasissutissaasinnaasut tamarmik misissornerini kalaallit 1953-imi kissaatigisaat naapertorlugu iliuuseqartoqarsimasoq. Qinersisinnaatitaanermulli tunngatillugu, nunasiaatit kalaallit nunaattut ittut, aatsaat 1960-imi qinersinnaatitaalerput. Taamaammat Danmarkip kusanarnerulaartumik iliuuseqarluni 1953-imi iliuuseqarsimasinnaasimagaluarnera ilaatigut nalunaarusiami allaaserineqarpoq.
