Kalaallit ajorsarput
Isikkamik arsaalluni Tysklandimi pissartanngorniuttoqarnerani – mini-VM-imik taagorneqartumi – kalaallit ajorsarput. Pissartanngorniunnermi semifinalimut anngunnissaminnik eqqarsaatigigaluagaat taamaalilluni pinngitsoorpoq.
Ippassaq unammineqartut tassaapput Zanzibarimeersut – qeqertannguaq taanna Afrikap kangimut sineriaaniippoq.
Kalaallit marloraarput, Zanzibarimiut sisamaraartut.
Semifinalimut kalaallit tassa anngutinngitsoorput, tassanili Zanzibarimiut Hamborgimut unammissapput. Cypernip avannaaneersut Gibraltarimiullu semifinalimi aamma unammisussaapput.
Nunarsuaq tamakkerlugu pissartanngorniutivinninnerni nunat peqataasinnaanngitsut uani unamminerni peqataatinneqarput.
Pissartanngorniutivinneq Tysklandimi aamma pisussaavoq, sapaatip akunnerata tulliani aallartissalluni.
