Kalaallit ajornartorsiutillit Aalborgimi amerliartorput

Helle Rønn inunnut isumaginninnermik siunnersortitut Kofoeds Skolemi sulivoq, suleqatillu sisamat peqatigalugit kalaallit Aalborgimi najugallit ajornartorsiutillit sullillugit.

Kalaallit 23-t Kofoeds Skolemut ullut tamaasa saaffiginnittarput, inissalli quliinnaallutik. Kommunimik suleqatiginninnissaq pillugu isumaqatigiissut pisoqaq matumani atuutsinneqarpoq, tamannali navianaateqarsinnaasoq Helle Rønn isumaqarpoq:

- Siornatigutut sullilluartigisinnaanngikkivut paasigaangamikku saaffiginnittarnerit ikilisarput, sumullu pisarpat, Helle Rønn aperivoq.

Aalborgip kommunia isornartorsiuinermut atatillugu akissuteqarpoq, isumaginninnermut pisortaq Hanne Manata qisuariaateqarami:

- Suliassamut atatillugu pilersaarusioreerpugut. Tamannali naammanngitsoq ilisimavarput, suliassarli aallartereerlutigu, Hanne Manata P4 Nordjyllandimut oqarpoq.

Ajornartorsiutillit ajornartorsiuteqarpallaalinnginnerini sumiinnersut paasineqarnissaat pingaartinneqarpoq:

- Kalaalerpassuit inuusuttut ajornartorsiuteqanngitsut Aalborgiliartarput. Ilinniarnertilli ilaatigut unitsittarpaat ajornartorsiuteqalersarlutillu, tamakkuuppullu tappiffiginerusariaqakkavut, Hanne Manata oqarpoq.

Taanna Kofoeds Skole maanna suleqatigilersaarpaa. Kalaallit Aalborgimi najugallit ajornartorsiutillillu pitsaanerusumik sullineqarnissaat, ilorraallu tungaanut sangutinneqarnissaat siunertaralugu, suliffeqarfiit assigiinngitsut suleqatigiilluarnerulersinniarpai.

Kalaallit Aalborgimi Kofoeds Skolemut 2006-imi saaffiginnittut 104-pput, maannalu 200-t sinnerpaat. Tassa marloriaataanik amerleriarsimapput.