Jens Lauridsen maanna atorfigisaminiit taamaatissinnaaleruni atorfittaamini sulilissaaq. Assi: Kalaallit Airports

Kalaallit Airports pisortartaartoq

Kalaallit Airports Holding A/S nutaamik pisortaaneqalerpoq, taavalu aningaasaqarnermut aningaasalersuinermullu pisortamik atorfinitsitsilluni.

Jens Lauridsen Kalaallit Airports Holding A/S-ip, Kalaallit Airports Domestic A/S-ip aamma Kalaallit Airports International A/S-ip pisortaanertut atorfinitsippaat.

Taassuma Peter Wistofte, ukiuni pingasuni pisortaareerluni Danmarkimi nutaanik unammilligassarsiorniarluni taamaatimmat taarserpaa.

Jens Lauridsen 47-nik ukioqarpoq timmisartortitseqatigiiffimmilu Jet Time A/S-imi atortorissaaruserinermut akisussaasutut pisortaanerup tulliatut maannamut atorfeqarluni. Tamatuma siorna Mittarfeqarfiit 2012-imiit 2016-imut puisortaanerattut aamma Air Greenlandip atortorissaarutaanut pisortatut 2016-imiit 2018-imut atorfeqarsimavoq.

Jens Lauridsen maanna atorfigisaminiit taamaatissinnaaleruni atorfittaamini sulilissaaq.

Mittarfiliortiterneq

* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.

* Qaqortumi nunap immikkoortuani meterinik 1500-nik takissusilimmik mittarfiliortoqassaaq.

* Mittarfissat taakku pingasuusut 3,6 milliardit koruunit missaannik akeqassangatinneqarput.

- Jens Lauridsen, nunatsinnik, nunatsinni mittarfinnik timmisartuussinermillu inuussutissarsiornermik ilisimannilluartuusoq, suliffeqarfissuarmi Kalaallit Airportsimi pisortaanertut atorfinikkumasimammat siulersuisut iluarisimaarpaat, siulittaasoq Jóhannus Egholm Hansen allappoq.

Nuummi, Ilulissani Qaqortumilu mittarfissuassaliortiternermi suleqatiginissaanut qilanaarput, Peter Wistoftilu piginneqatigiiffimmut ukiuni kingullerni pingasuni sullissinerujussuanik qutsavigalugu, taanna nangippoq.

Suliffeqarfissuup aamma Steen Montgomery-Andersen aningaasaqarnermut aningaasalersuinermullu pisortatut atorfinitsippaa.

AAMMA ATUARUK Ilulissani mittarfittaassaq ukioq ataaseq tikillugu kinguaattuussasoq

Taanna 63-inik ukioqartoq suliffeqarfimmilu atorfeqareertuulluni nunatsinni ukiorpassuarni sulivoq, ilaatigut Tele Greenland A/S-imi pisortap tulliatut aningaasaqarnermullu pisortatut 2005-imiit 2019-imut atorfeqarluni, taavalu KNI A/S-ip siulersuisuini aamma Sikuki Nuuk Harbour A/S siulersuisuini 2019-imiilli ilaasortaalluni.

- Steen Montgomery-Andersenip pisortaaqatigiinniilernerani aningaasaqarnikkut aqutsinerup, aningaasalersuinerup, periusissatigut aqutsinerup, attaveqaqatigiinnerup aamma aaqqissuussaanermi inerisaanerup iluanni annertoorujussuarmik misilittagalimmik, aammalu Kalaallit Nunaanni inuussutissarsiornermi ukiuni 25-ini misilittagalimmik, ingerlatseqatigiiffik pisortartaarpoq, siulittaasoq allappoq.

Taanna ukioq manna aggustip aallaqqaataaniit atorfinippoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat