Danmarkip Kalaallit Airports Internationalimik piginneqataanissaa pillugu isumaqatigiissut Kim Kielsenimit sapaatit akunnerata siuliani atsiorneqarpoq. Asseq: KNRAssi: KNR / Foto: Jonas Fievé

Kalaallit Airports pillugu piginneqatigiinnissamik isumaqatigiissut saqqummiunneqartoq

Danmarkip Kalaallit Airports Internationalimik piginneqataanissaa pillugu isumaqatigiissut Folketingip nittartartagaatigut saqqummiunneqarpoq.

Danmarkip Kalaallit Airports Internationalimik piginneqataanissaa pillugu isumaqatigiissut Kim Kielsenimit sapaatit akunnerata siuliani atsiorneqarpoq.

Isumaqatigiissulli atsioqatigiittoqarneranut atatillugu avammut saqqummiunneqanngilaq.

Isumaqatigiissulli Folketingip aningaasaatinut ataatsimiititaliaanit akuersissutigineqartussaanera pissutigalugu Folketingip nittartagaatigut maanna pissarsiarineqarsinnaalerpoq. Piginneqatigiinnissamik isumaqatigiissut ilanngussatut ikkunneqarpoq.

Isumaqatigiissummi immikkoortut pingaarnerit ataaniittut danskit aningaasaatinut ministereqarfiata Folketingip aningaasaatinut ataatsimiititaliaanut saqqummiuppai:

 

Danmarkip Nunatsinni mittarfinnut aningaasaliinera
* Naalagaaffik Nuummi Ilulissanilu mittarfinnut 700 mio. koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai
* Den Nordiske Investeringsbankimit 450 mio. koruuninik atorniartoqarpoq, naalagaaffillu atornermut qularnaveeqqusiisuuvoq, taamaalilluni atukkanit erniat appasissinnaallutik.
* Naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
* Naalakkersuisut Naalagaaffillu 220 mio. koruuninik sanitigut aningaasaliipput, taakku Nunatsinni inuussutissarsiornerup ineriartortinneranut atorneqassapput.

  • Illuatungeriit ingerlatseqatigiiffimmik piginneqataanerat ingerlatseqatigiiffiup akuleruffigineqarani ingerlasinnaaneranik tunngaveqassaaq.
  • Ingerlatseqatigiiffiup siulersuisui ataatsimeersuarnermi qinikkat tallimat arfineq-marlullu akornanni amerlassuseqassapput, Kalaallit Airports Holding A/S-ilu Namminersorlutik Oqartussanit tamakkiisumik pigineqartoq siulersuisuni ilaasortassanik sisamanik inassuteqassaaq, tassunga ilaallutik siulersuisuni siulittaasoq, danskillu naalagaaffiat siulersuisuni ilaasortassanik marlunnik inassuteqassaaq.
  • Assersuutigalugu nutaanik aktianik pigineqataasoqalerneratigut ingerlatseqatigiiffimmilu inatsisitigut pingaarutilinnik allanngortiterisoqarnerani naalagaaffiup ikinnerussuteqarluni piginneqataanerata illersugaanissaa.
  • Ingerlatsinermut iluanaarutinullu politikki pingaarnerusoq, Kalaallit Airports International A/S-ip niuernerpalaartumik tunngaveqarluni ingerlanneqarnissaanik qulakkeerisussaq, sinneqartooruteqarfiulluni ingerlanneqarnissaa siunertaralugu, ingerlatseqatigiiffiulli pingaarnertut siunertarisaa eqqarsaatigineqassaaq, tassalu attaveqarnermik pitsaasumik Kalaallit Nunaannut iluaqutaasussamik pilersitsinissaq ingerlatsinissarlu.
  • Tamanna pissutigalugu iluanaaruteqarnissamut sukannersumik politikkeqassanngilaq.
  • Piseqqaartussaatitaaneq. Illuatungerisaq aktiaatiminik tuniniaarusussappat Namminersorlutik Oqartussat danskillu naalagaaffiat illuatungerisamik ingerlaqatigiiffimmi akitiaataanik piseqqaartussaatitaassapput.

Isumaqatigiissut tamakkerlugu uani atuarneqarsinnaavoq: Piginneqataanissamik isumaqatigiissut (danskisut allaqqavoq).

Aningaasaatinut ministereqarfik aamma allappoq isumaqatigiissut oqimaaqatigiiffiusoq pineqartoq, danskillu naalagaaffiat ikinnerussuteqarluni piginneqataasutut illersugaassasoq.

Folketingip aningaasaatinut ataatsimiititaliaata taamaalilluni isumaqatigiissut akuereqqaartussaavaa. Kim Kielsenip isumaqatigiissummi immikkoortut pingaarnerit Inatsisartut aningaasaqarnermut akileraartarnermullu ataatsimiititaliaannut saqqummiutereerpai ataatsimiititalialli isumaqatigiissut akuereqqaartussaanngilaa.

Isumaqatigiissutip Naalakkersuisunit saqqummiunneqannginnera partiip illuatungiliuttup Partii Naleqqap isornartorsiorpaa, tamatumunngalu atatillugu Pele Broberg Partii Naleqqameersoq §37 naapertorlugu arlalinnik apeqquteqaateqarpoq. Isumaqatigiissutip qaqugu tamanut saqqummiunneqarnissaa ilaatigut apeqqutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat