Kalaallit Airports Holding A/S marlunnik ingerlatsiveqalersoq

Kalaallit Airports Holding A/S Nuummi, Ilulissani aamma Qaqortumi mittarfinnik sanaartornissaq, piginninnissaq ulluinnarnilu ingerlatsinissaq aammalu taakkununnga atassuteqartunik suliffinnik ingerlatsinissaq siunertaralugu ingerlanneqartoq, ingerlatsivinnik marlunnik pilersitsiniarluni immikkut ittumik tallimanngormat kingullermik ataatsimeersuarsimavoq.

Kalaallit Airports Holding A/S-ip immikkut ataatsimeersuarnissaa sisamanngormat kingullermik akuersissutigineqarsimavoq.

- Tamannalu isumaqarpoq ingerlatsivinnik marlunnik pilersitsinitsinnik. Piginneqatigiiffik ataaseq taaguuserneqarpoq Kalaallit Airports Domestic A/S, taassumalu Qaqortumi mittarfiliassat suliaqarfigissavaa, kiisalu Kalaallit Airports International A/S Nuummi aamma Ilulissani mittarfissualiassanik isumaginnittussaq, Peter A. Wistoft, Kalaallit Airports Holding A/S-imi pisortaanerungallartoq, maannalu ingerlatseqatigiiffiit qullersaqarfigiligaanni, Kalaallit Airports Holding A/S-imiittoq, taama oqarpoq.

Peter A. Wistoftip nassuiaanera naapertorlugu ingerlatseqatigiiffinnik marlunnik pilersitsineq pissuteqarpoq qallunaat naalagaaffiata Nuummi aamma Ilulissani mittarfissanik piginneqataasussaanera. Qaqortumi mittarfissaq Namminersorlutik Oqartussanit tamakkiisumik pigineqartussaasoq.

Taamaalilluni ingerlatseqatigiiffiit taakkua marluk Nuummi aamma Ilulissani mittarfissuassat kiisalu nunap immikkoortuani mittarfissaq, Qaqortumiittussarlu, immikkut tamarmik suliaqarfigissavaat.

Immikkut ittumik ataatsimeersuarnermi Kalaallit Airports A/S-ip taaguutaa Kalaallit Airports Holding A/S-imut ilanngullugu allanngortinneqarpoq.

Namminersorlutik Oqartussat Kalaallit Airports Holding A/S-imi piginneqatigiissutit pingajorarterutaat marluk pigigaat qallunaat naalagaaffiata piginneqatigiissutit pingajorarterutai pigivai.