Kalaallit Aarhusimiittut nutaamik ornittagaqalersut
Illoqarfiup illoqannginnersaani Klostertorvimi inuuniarnikkut ikiortariallit, ilaatigut kalaallit, katersuuttarfigisaata oqalisaavigineqarnissaa matumani siunertarineqarpoq. Kommunilli isumaginninnermut suliffissaqartitsiniarnermullu ataatsimiititaliaani siulittaasup Thomas Medonip erseqqissaatigaa, kalaallit inuuniarnikkut ikiortariallit aalajangersimasumut nuunnissaannik pinngitsaalinissaannik siunertaqartoqanngitsoq, pitsaanerusumilli neqerooruteqarfiginissaat siunertaasoq.
- Inunnut pineqartunut ornittakkami amerlanerulaartunik neqerooruteqassaaq ataqqinarnerusumillu misigisaqartinnissaat aamma neqeroorutigaarput. Tamannalu tulluusimaarutigaara, TV2 Østjyllandimut taama oqarpoq.
Ornittakkami nutaami ullup ingerlanerani sammisassaqartitsisoqartassaaq kiisalu amigaateqartunut nerisassaqarlunilu siniffissaqassalluni. Aningaasatigut ikiorsiissutit ornittakkami aamma tunniunneqartassapput aammalu assersuutigalugu imigassamik ajornartorsiutilinnik katsorsaasarneq suliffissarsiornerlu pillugit ikiuisoqarlunilu tapersersuisoqartassalluni.
Ornittagaq Kirkens Korshærip Aarhus Kommunimilu isumaginnittoqarfiup suleqatigiinnerisigut ukiumi ataatsimi misiliutitut ingerlanneqaqqaarallassaaq. Ingerlanneqarneralu 2,5 millionit koruuninik akeqassaaq, taakkunanngalu millionip affaa Kirkens Korshærip akilissavaa ingerlatsisussaallunilu.
Ornittagaq Spanien 61-imi inissisimavoq. Aamma kalaaliunngitsunit atorneqarsinnaavoq, marluinnillu oqaasilinnik sulisoqassalluni. Ornittakkami aqutsisoq tassaavoq Kristian Blæsbjerg, siornatigut Aarhusimi Kirkens Korshærip ornittagaataanik aqutsisuusimasoq.
Suliffissaqartitsiniarnermik suliniut Kammak Aarhusimi ingerlanneqareerpoq, aamma Kofoeds Skole illoqarfimmi kalaallinik inuuniarnikkut ikiortarialinnik sulilersitsiniarnermik neqerooruteqarpoq.