Kalaallit aammik akuluiartikkiartortut suli aallartinneqartassapput

Tartulullutik nappaateqartut suliarineqartarnerat Nunatsinnut nunneqarsinnaanersoq, inatsisartunut ilaasortap Olga P. Berthelsenip naalakkersuisunut apeqquteqaatigaa.

Napparsimasut amerlanerpaamik marluk ataavartumik aammikkut akuluiartikkiartortut Danmarkimut ukiut tamaasa aallartinneqartarput. Aammikkut akuluiartikkiartortut Danmarkiliartinneqartartut katillutik maannakkut arfineq-marluupput – taakkunannga pingasut Danmarkimiittuaannartariaqarlutik.

Taamaakkaluartoq Nuummi aammik akuluiartittarfimmik pilersitsisoqarnissaanut taakku suli ikippallaartut, Agathe Fontain Olga P. Berthelsenimut akissuteqarnermini allappoq.

Taama ikitsigitillugit sulisut pisinnaasaannik attassiniarnissaq ajornakusoorpallaassanerarpaa.

- Tamaammat aningaasartuutissat annertuallaassapput. Taamatummi aammik akuluiaanissaq 4,7 millionit koruuninik akeqassaaq taamatullu suliarinnittarneq ingerlanneqarneralu ukiumut 3,5 millioni koruuneqartussaalluni, Agathe Fontain paasissutissiivoq.

Aammik akuluiaasarnerit assigiinngitsut marluupput. Nassat ameraasaatigut aammik akuluiaaneq nunatsinni suliarineqartareerpoq aammillu saliineq ajornarnerusoq taamaallaat Rigshospitalimi Frederiksberg Hospitalimiluunniit suliarineqartarluni. Tassa aammik akuluiaasarneq naalakkersuisut nunatsinnut nuukkusunngilaat.