Kalaallit aallartitaat tusaamasat akornanni najuupput
Claus Nielsen Frederik Lundbladilu Timersoqatigiit Kattufiannit alaatsinaatsutut peqataapput.
- Dansk Idræts Forbundip qaaqqugamisigut. Savalimmiut Kalaallit Nunaallu Dansk Olympisk Komitép ataaniikkamik, taamaattumik immikkut qaaqqusaavugut. IOC-p arfininngornermi, sapaammi ataasinngornermilu ataatsimiinnerani oqallinnerit assigiinngitsut apeqqutillu peqataaffigissavagut, Claus Nielsen nassuiaavoq.
Nunatsinneersut tusarnaaginnarnatik aamma oqaaseqarsinnaassapput.
Claus Nielsenip erseqqissaatigaa nunarput erfalasuni atorlugu OL-imut suli peqataasinnaanngitsoq. Danmarkilli erfalasua atorlugu, assersuutigalugu ooqattaasarlutik sioraatinik arpattartut OL-imi pissartanngorniunnermi peqataasinnaasut. Nunarput namminersulivippat nammineq erfalasorput aatsaat atorneqarsinnaanngussaaq.
Claus Nielsenip nunatsinnit angalaqatigaa siulersuisuni ilaasortaq Frederik Lundblad. IOC-p ulluni tullerni ataatsimiinnerani peqataassapput. ippassarlu ataatsimeersuarnerup pisortatigoortumik ammarneqarnerani KNR-TV-kkut aamma aallakaatinneqartumi tusaamasarsuarnik naapitsipput. Claus Nielsenip tulluusimaarutiginerpaava arsaattartorsuaq Pele naapikkamiuk.
- Siullermik oqassaanga tusaamasarsuit allatulli inuinnaapput. Assammillugit oqaloqatigillu tamanna paasinarpoq. Taakkua qangali fjernsynimi takuinnartakkat naapillugit pikkunaqaaq. Annerusumik una Pele naapikkakku nuannaarutigivara, oqarpoq.
Qangali, meeraallunili arsaattartuni guutitut isigisani Pele naapikkamiuk atsiortippaa, oqaloqatigigalugu assiliseqatigalugulu.
- Kalaallit Nunaanni susarnitsinnik oqaluttuarfigaara. Tikeraarsarlugu qaaqqugaluarpara. Takussavarpummi. Oqarfigaara Kalaallit Nunaannut tikikkusukkuni kalerriiginnassasoq, Claus Nielsen oqarpoq.
TV-kkut aallakaatitassiortartoq nunarsuarmi tamarmi tusaamasaq Oprah isermat naammattoorlugu oqaloqatigillatsiarpaa assiliseqatigalugulu.
- Sunaaffa Kalaallit Nunaat nalunngikkaa sunaanersoq. Nunarput arlaanni assut tikikkusukkaluarpaa. - Oqaannassaatit, neriuppunga tikissasutit, taama oqarfigaara, Claus Nielsen oqarpoq.
Claus Nielsenip aamma danskit OL-imi pissartanngornikut arlallit naapissimanerarpai.
Illoqarfiit sisamat 2016-imi OL-erfissatut unammersuaarput, tassaasut: Japanimi illoqarfiit pingaarnersaat Tokyo, Spaniami illoqarfiit pingaarnersaat Madrid, USA-mi illoqarfissuaq Chigaco kiisalu Rio de Janeiro.
Claus Nielsenip neriuutigaa Rio de Janeiro ajugaassasoq.
Illoqarfik sorleq toqqarneqarnersoq nunatta nalunaaqutaa malillugu ualeru pingasut-qeqqanut nalunaarutigineqassaaq. KNR-TV-kkut IOC-mut tunngatillugu toqqaannartumik unnugu arfineq-marluk qeqqata tungaanut aallakaatitsisoqarpoq.
