Kalaallit aallartitaat piareersimapput

Tamanna naammassineqassanersoq suli isumannaarneqaqqajanngikkaluarpoq, anguniagaasorli tassaalluni Kalaallit Nunaata sila pillugu siunnersuutaata paasineqarnissaa pilersissallugu, taama oqarpoq Kalaallit Nunaata aallartitaasa aqutsisuat Michael Pedersen.

Suliarput tassaavoq suut tamaasa erseqqissumik paasitinniaratsigik Kalaallit Nunaatalu isumai sumiinnersut ersersinniarlugit, nalunanngimmammi iliuuseqalersinnata tamakkua tamarmik qanoq kinguneqassanersut takoqqaarumagatsigik.

Danmarkimmi oqaatigereersimavaa Kalaallit Nunaat siumut isumaqatigiissuteqarfigereersinnaanagu, pissutigalugu nunarsuarmi tamarmi siunissami isumaqatigiissutissaq qanoq isikkoqassanersoq ilisimaneqanngimmat. Naatsorsuutigaarput tamatumunnga malitsigitillugu Kalaallit Nunaanni inuiaqatigiinni inatsisartuniluunniit oqallitsitsissalluta Kalaallit Nunaannut isumaqatigiissut qanorpiaq isikkoqassanersoq pillugu.

- Ataatsimeersuarnermi matumani suut iluatsitsivigissallugit neriuutigaasigik?

- Iluatsitsiviusinnaasut naatsumik oqaatigissagaanni tassaapput uagut aatsaannguummat Danmarkimut nassiussavut erseqqissorujussuarmik isumaliutaasut isumaqarpugullu isumaqatigisinnaassagaat naapertuilluartumik isumaqatigiissuteqarniassagutta silamut tunngatillugu akisussaasuunitsinnik ersersitsisumik, tassanilu pingaartipparput 2007-imi innuttaasut atuineranni aniatitsinerup annertussusia 2020-mi 5 procentimik annikillisissagatsigu.

- Innuttaasut atuinerisa avataaniittut tassaapput aatsitassarsiornermi ineriartortitsinissami periarfissat aammalu suliffissuit nukimmik pisariaqartitsilluinnartut, soorlu Alcoa pillugu pilersaarut, tamakkua isumaqatigiissutip avataaniipput.

- Iluatsitsiviusinnaasut siunnersuummi tassani ajornanngitsuararsuupput.

- Aap, taamatummi oqartoqarsinnaavoq, tassami taamaaliornissatsinnut piginnaatitaavugut, isumaqarpugullu tamanna Kalaallit Nunaannut peqatigisaanillu nunarsuarmut pitsaasuusoq, tassami nukimmik atuiffiunerpaat allanngortillugit nukimmik ataavartumik nukissiuutinngortissagatsigik, soorlu Kalaallit Nunaanni taamaattoqartoq.

Naalakkersuisut siulittaasuat, Kuupik Kleist aallartitanut sisamanngorpat ilanngutissaaq.