Kalaallit Aalborgimi isiginnaartitseqataalerput
Kalaallit marluk danskit isiginnaagassiaanni ”Jeppe Qaqqarmiu”-mi peqataapput. Unnugu sisamanngornermi isiginnaagassiaq Aalborg Teater-imi takuteqqaarneqalerpoq. Isiginnaagassiami paarlakaajaallutik isiginnaartitsisussat tassaapput 69-inik ukiulik Juliane Larsen aamma Maniitsormiu 43-nik ukiulik Terkild Møller.
Unnugu siullerpaamik Juliane Larsen isiginnaartitsisarfimmi Aalborg Teater-imi isiginnaartitseqataalerami assut pissangavoq.
- Pitsaasorujussuupput ikiuukkumatullutillu, siullerpaamilli taamatut peqataalerama naakka annernakujulaarput. Kisianni ilimagaara neriuutigalugulu ingerlalluassasoq, nunatsinni isumaginnittoqarfinni pisortaasarsimasoq massakkullu soraarneq Juliane Larsen oqarpoq.
Isiginnaagassiaq ”Jeppe Qaqqarmiu” quiasaarusiaavoq Ludvig Holberg-ip sanaarisimasaa. Massakkut suliarineqarnerani Hans Henriksen ilitsersuisuuvoq isiginnaagassiamilu pingaarnertut inuttaalluni isiginnaartitsisartoq Martin Ringsmose.
Unnugu sisamanngornermi isiginnaagassiap takuteqqaarneqarnerani Juliane Larsen isiginnaartut akornanni issiassaaq, isiginnaartitsisullu aalajangersimasup apeqqutai akereerunigit isiginnaartitsivissuarmut qaqissalluni. Isiginnaartitsissutip oqariartuutaa isiginnaagassiap naajartornerani Juliane Larsen-ip atuffassissutigissavaa.
- Holbergip oqariartuutaa isinnaartuunut atuffassissutigissavaat. Taava Jeppe anillassaaq qiteqatigalugillu, taamaalippallu isiginnaagassiaq naassaaq, Aalbog Teaterimi dramaturgi Jens Christian Lauenstein Led KNR.gl-imut taama allappoq.
Isiginnaagassiaq ”Jeppe Qaqqarmiu” oktoberip 13-ata tungaanut Aalborg Teater-imi isiginnaartitsissutigineqartassasoq pilersaarutaavoq.