Kalaallit 44-nik ulunnapput

Issittormiut timersorlutik unammiuaaqatigiittarnerat Arctic Winter Games, 20-ssaa ingerlanneqartoq, ippassaq naammassivoq, kalaallillu peqataasut ulunnalluartut, Sermitsiaq nittartakkimi allappoq.
Allattoq Elisa Isaksen
marsip 16-at 2008 17:52

Kalaallit peqataatitaat 44-nik ulunnapput, tassa ulut kuultit aqqaneq marluk sølvit 14-it kiisalu bronzit 18-it.

Kalaallit ulunnalluarnerannut sulorartartut pissutaanerpaapput, taakkumi katillugit arfineq pingasunik kuultinnammata, pingasunik sølvinnallutik tallimanillu bronzinnallutik. Nerrivimmi arsaarartartut katillugit 18-inik ulunnapput.

Timersortartut Alaskameersut angusarissaarnerpaapput, taakkumi katillugit 202-nik ulunnakkamik.

Unammiuaaqatigiinneq naammassimmat pisarneq malillugu peqataasut kavaajaminnik tuluujuaqqaminnillu paarlaateqatigiipput.