Kalaallit 38-raarlutik ajugaapput Algeriarmiut 33-raartut

U21-t assammik arsarnermi VM-erneranni Igitsinimi ingerlanneqartumi Kalaallit Nunaat ullumi ajugaavoq 38-raarluni Algeriet 33-raarluni ajorsartoq.
Allattoq Elisa Isaksen
aggustip 13-at 2009 11:05

Unamminerup affaani siullermi Nunatta unammisartui 22-raarlutik siuaqqapput unammisaat 20-raartut. Unammineq 500 missaaniittut isiginnaartoralugit Suezimi pivoq.

Sungiusaasoq Jacob Andreassen unamminerup kingorna oqarpoq, unammisartut Algeriamut unammilluaqisut, naak Danmarkip taakkua unammigamigit ajornartorsiorfigisimagaluarai. Taamaattumik Danmarkip Algeriamut siusinnerusukkut unammineranni videuliap isiginnaaqqissaarneratigut unamminermi qanoq periaaseqartoqassanersoq oqaloqatigiissutigineqarpoq. Taakkua isaatitsisartuata paareqqissaarneqarneratigut qeqqanilu paarsilluarnikkut saassussisarnerat killilersimaarneqarmat.

Kalaallini Angutimmarik Kreutzmann aqqanileraarluni isertitsinerpaavoq. Kalaallit VM-imi unammisaqattaarnitik aqagu naggataassavaat. Unammisassaat tassaassallutik Iranip Qatarillu ullumikkut unammineranni ajugaasussat. Aqagu unamminissaq VM-imi peqataasuni holdini 24-usuni, normu 17-18-inngorniuttoqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq