Kalaallisuut nittartakkamiilissapput

Nunatsinni katersugaasiviit piffissami qaangiuttumi assuutit nalinginnaanngitsut Sisimiut Katersugaasiviannut nassiussuuppaat, assuutillu tamakku 36-usut, Nunatta Avannaaneersut, Kitaaneersut, Kujataaneersut Tunumeersullu sumingaanneersuuneri immikkuullarissut, qaammammi matumani assiliortorneqassapput, katersugaasivimmilu nalunaarsorneqassallutik.
Assiliisartup, Roberto Fortunap, Danmarkimi Katersugaasivissuup Eriagisassanik Bredemi immikkoortortaaneersup, assiliissut immikkorluinnaq ittoq atorlugu assuutit tamaasa ataasiakkaarlugit 24-nngorlugit assiliortussavai. Atortorissaarut immikkut ittoq kaavitittakkamut ikkuteriarlugu assiliiviup saavani kaaviaartillugit assiliortussallugit. Suliani naammasseriarpagu assit qarasaasiakkut kaaviiaartillugit qimerloorneqarsinnaalissapput, taamalu atisat sammivinnit tamaniit isiginnaarneqarsinnaassallutik, immikkuualuttunnguinut allaat ilanngullugit.
Suliaq naammasseriarpat, assit Sisimiut Katersugaasiviata nittartagaani qimerloorneqarsinnaalissapput, piffissamili aggersumi Danmarkimi Katersugaasivissuarmi atisanik katersugaatinut ilanngunneqassallutik.
Kalaallit assuutaannik assiliiortornissaq una, tassa Nunatta kulturikkut oqaluttuarisaanerani nalilittut pingaaruteqartussaq, tamanit takuneqarsinnaasunngortinneqassaaq, Nunatsinni katersugaasiviinnaanngitsunit, Nunattali avataaniittunit soqutiginnittunit aamma.