Kalaallisuut inuusuttut soqutigilluarpaat
-Inuusuttorpassuit nammineq kalaallisuussaminnik mersorlutik aallartereersimallutik takkupput. Peqataasut ilaat kalaallisuuliatik nassarlugit takkupput, Hans Olsen, sapaatiummat workshoppertitsinermik aaqqissuisuusoq oqarpoq.
Aappariit Karen aamma Finn Pedersen, atuakkamik Kalaallisuut-mik atuakkiortuusut workshoppimik ingerlatsisuupput. Kalaallisuut oqaluttuassartaat, atorneqartarneri ilisarnaataallu oqaluttuarineqareermata, peqataasut amermik sapangaaqqanillu mersornermut periaatsit assigiinngitsut misilittarnissaannut periarfissinneqarput.
Peqataasut 39-iusut akornanniipportaaq Nationalmuseumip ilisimatuuisa ilaat, taannalu assiliilluni allattuisupilussuuvoq, Hans Olsen oqaluttuarpoq.
Islandimi, Savalimmiuni Kalaallit Nunaannilu assassoriaasitoqqat soqutigineqartupilusuunnerat Nordatlantens Bryggemi maluginiarneqarsimavoq. Siornatigut aamma islandimiut tujuulussualiortariaasiat, savalimmiormiut qilattaariaasiat, umimmaat nunatsinneersup qiviui paffequtillu nuannarineqarluartut, islandimiut juullip orpiliaanut qaarajuttuliaat kiisalu islandimiut qilattaallutik grafittiliaat pillugit workshoppertitsisoqarsimavoq.
Kalaallisuut annertuupilussuarmik suliassartaqartut aallaavigalugit kalaallisuullu immikkuualuttortai pingaarnerutillugit amerlanerusunik workshoppertitsisarniarluni Bryggenip maanna eqqarsaatigaa.