Kalaallisuut Alaskamut nassatassat pisariutitsisut

Asii Chemnitz Narup Alaskami kalaallisuussava Hans Enoksenilu kameqarluni ICC-ip ataatsimeersuarnissaani oqalugiarluni? ICC sapaatit akunneri pingasut qaangiuppata Alaskami Utqiarfimmi qulissaa ataatsimeersuassaaq, ullunilu makkunani aaqqissuisut sulillualeruttorput. Suliallu ilagaat Kalaallit Nunaannit peqataasussat 72-iusut kalaallisuussagaluarunik ilanngaaserusunit arsaarneqannginnissaat qulakkiissallugu.

USA-mi malittarisassat sakkortungaatsiartut malinneqarput, malittarisassallu ilagaat puisit nannullu amiinit sanaanik USA-mut eqqussisinnaannginneq, taakkorpiaallu tunngavigalugit Inuit Issittormiut Kattuffiata ataatsimeersuarnissaanut peqataasussat allafeqarfimmiit allagarsisimapput aperineqarlutik kalaallisuuminnik nassarniarnersut. Peqataasussallu nalunaareerpata Namminersornerullutik Oqartussat nunanut allanut allafeqarfianiit peqataasussat allakkiamik tunineqassapput tassanilu erseqqissarneqassaaq ilumut puisit nannullu amii kalaallisuunut atorneqartarneri. Taamaaliornikkut kalaallisuunik arsaarneqannnginnissaq ICC-miit qulakkeerneqassasoq neriuutigineqarpoq.