Kalaallisut taagutit atillu ataqqineqartariaqarput

septembarip 15-at 2005 05:43

Nunatsinni illoqarfiit kalaallisut taaguutaat qallunaat sungiuttariaqaraat, Anders Fogh Rasmussen oqarpoq. Fogh Rasmussen Naalagaaffimmi illoqarfiit atiinik taaguisarnerni maleruagassanik allannguerusunngilaq.

Dansk folkeparti-p oqaaseqartartua Søren Espersen, Anders Fogh Rasmussen-mut saaffiginnissuteqarpoq, Kalaallit Nunaanni illoqarfiit taaguutaasa atuagassiani kultoorit tamaasa pingaartillugit, pinngitsoorani kalaallisut qallunaatullu taaguteqartariaqartut, soorlu illoqarfik Nuuk allanneqaraangat saniatigut qallunaatut taaguutaa Godthåb ilanngunneqartariaqartoq.

Atsersuisarnermut inatsit Namminersornerullutik Oqartussanit 1983-mi oqartussaaffigineqalerpoq.

- Pissutsit assigiinngitsut apeqqutaallutik, pisariaqarfiani kalaallisut qallunaatullu illoqarfiit taaguutaat atussallugit pisariaqarsinnaavoq, kisiannili Kalaallit Nunaanni oqaatsitigut ineriartorneq Naalagaaffiup malittariaqarpaa, aamma pisortatigoortumik saaffiginnittarnitsinni, Anders Fogh Rasmussen erseqqissaavoq.