Saudi-Arabia takornarianut ammarneqarpoq
Saudi-Arabiap takornarianut siullerpaamik ammarneqarnissaa, Saudi-Arabiami oqartussat ullumi tallimanngornermi aalajangerpaat.
Nunamut taassumunnga maannamut takornariarsinnaatitaasoqarsimanngilaq.
Suliffiutillit nunanit allaneersut, nunamilu tassani susaqqartut maannamut Saudi-Arabialiarsinnaatitaapput, muuamaakkormiullu ilerfiartut Mekkaliarlutillu Medinaliarsinnaatitaapput.
Saudi-Arabiami 2030-p tungaanut aaqqissuusseqqittoqarnissaa, Saudi-Arabiap kunngissaata Mohammed bin Salmanip aalajangeqqammerpaa, takornariartitsinerlu periarfissaalissalluni.
Uuliap nunani tamalaani pingaarnerpaatut aningaasarsiorfiujunnaarsinnaanissaa, Saudi-Arabiap piareersarfigileruttorpaa, takornariartitsisarnerlu piorsarniarneqalerluni.
Takornariat 100 millionit ukiumut Saudi-Arabialiartalernissaat, Saudi-Arabiami naalakkersuisut neriuutigaat.
Arnat nunanit allaneersut "pissusissamisoortunik" atukkersorsimasassapput
Arnat qanoq atukkersorsimasassanersut pillugu malittarisassat sukannersut oqilisinniarneqartut, Saudi-Arabiami takornariartitsinermut ataatsimiititaliap siulittaasua Ahmad al-Khateebip ilisimatitsissutigaa.
Saudi-Arabiami arnat Abayamik taaguuserneqarsimasumik maanna atukkersorsimasassapput, timip tamaa qallerneqarsimassalluni. Arnalli nunanit allaneersut pissusissamisoortunik, soorlu Ahmad al-Khateebip oqaatigigaa, atukkersorsimasinnaassapput.
Imigassalli aalakoornartutallit nunami tassani inerteqqutaalluinnarnerat, malittarisassallu assigiinngitsut sukannnernerat pissutaalluni takornariat mililionilikkaat Saudi-Arabialiarusunnginnissaat, alaatsinaattut nunanit tamalaaneersut ilimagaat.
/ritzau/dpa