Kalaallisut pisinnaasaqarnissaq pingaartuusoq

Kalaallisut oqaativut Ilisimatusarfimmi rektoritut atorfeqalertussamut pinngitsoornani piumasaqaataasariaqartoq, IA-meersoq isumaqarpoq.

Rektorimik kalaallisut oqalussinnaasumik Ilisimatusarfik atorfinitsitsissasoq, Inuit Ataqatigiit sinnerlugit Inatsisartuni ilaasortap Mimi Karlsenip kaammattuutigaa.

Ilisimatusarfimmi nutaamik rektorissarsiortut atorfimmik pilersaarummi ima ilaatigut allassimanerat, Mimi Karlsenip maluginiarsimavaa "Kalaallit oqaasiinik ilisimasaqarneq pitsaaquteqassaaq, kisianni piumasaqaataanngilaq".

- Tamanna assut akueriuminaappoq. Mimi Karlsen tusagassiuutinut nalunaarummi taama oqarpoq.

Nunani allani ilisimatusarfimmi pisortap nunap oqaasiinik oqaluttuunera, taassuma tikkuarpaa. Kalaallisullu oqaatsitta pingaartinneqartuarnissaat, nukittunissaat ineriartittuarnissaallu Ilisimatusarfiup pisussaaffigigaa aamma oqaatigalugu.

- Ilisimatusarfik tassaammat nunatsinni ilisimatuussutsimik qaffassaasussaq, nunatsinni naleqartitatsinnik aammalu oqaluttuarisaanitsinnik ilisimasaqarfiusussaq soorunami pingaaruteqarpoq pisortassap kalaallisut paasinnillunilu oqalussinnaanissaa, Mimi Karlsen, Inuit Ataqatigiit sinnerlugit Inatsisartuni ilaasortaq taama oqarpoq.


 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl