Kalaallisut pinnguaat tunisalersinnaassagunarpoq

Meeqqanut computerspili, tassalu qarasaasiat atorlugit kalaallisut pinnguaat ukioq naatinnagu tunisaalersinnaassagunarpoq, Nuummi suliffeqarfimmi namminersortumi Icemediami piginneqataasoq Johannes Müller Nunafondenimit 200.000 koruuninik aningaasaliiffigineqarallartillugu.

Johannes Müller suleqatinilu kalaallisut oqaluttunik spililiornissamut qangali pilerisuttarsimapput, spililu saqqummersitsisarfik Atlantic Music suleqatigalugu piviusunngortinniarsaraat taaguutilik: Pinnguarta Ilinniarluta 1.

- Kisitsisit naqinnerillu ilinniarneqarsinnaapput, aamma uumasuusivimmi uumasunut tunngasut kiisalu illunut, illoqarfinnut pinngortitamullu tunngasut spilimi ilanngunneqarput. Johannes Müller nassuiaavoq.

Aamma oqarpoq, ullumikkut spilit pisiassat tamarmik danskisuujunngikkunik tuluttuujusarneri uggorisarlugit.

- Meeqqat assersuutigalugu Pixelina allamiutut oqaasertaqaraluartoq nuannarisorujussuuaat, qanorli paasisinnaasaminnik spileqaraluarpat. Johannes Müller oqarpoq.

Icemediap spili maannamut 40 %-ia naammassisimalerpaa, maannalu aningaasat pisariaqartinneqartut affai inorlugit taamaallaat tunniunneqaraluartut suliaminnik nangitseqqissinnaanngorlutik Johannes Müller oqarpoq, spililli meeqqanit soqutigineqarluarnera qularutiginnginnerarpaa.

- Assersuutigalugu panimma tallimanik ukiullip spili naammasseqqajanngikkaluartoq nuannarisorujussuuaa, naammassinissaalu erinigeqaa. Nassuiaavoq.

Aamma erseqqissaavoq, aningaasat pisariaqartinneqartut tamakkerlugit pissarsiarigaluarunikkik spili ukiup naalernerani naammassisinnaagaluarlugu, aningaasalli tamakkerlugit suli pissarsiarineqanngimmata qaqugu naammassisinnaanissaa ulluleruminaatsoq.