Atuakkami arnat inuusuttut marluk imminortoqarsimaneranik paasiniaasut sammineqarput. Arnat taakku marluk imminnut tiguartisimaffiginerat pinnguarinerallu kingunipiloqalerpoq aappaa ajorsaarinermut sakkortuumut, toqumik kinguneqartumut, nuiuunneqarmat, napa.gl allappoq.
- Atuartartut nunamik nutaarsiassanit nalinginnaasumik ajortuinnaasartunit imartunerujussuarmik inuuneqarfiusumik misigisaqartikkumallugit pissanganartuliamik imaluunniit paasiuminaatsumik paasiniaaffiusumik oqaluttualiornissaq toqqarpara. Tamatumanilu takutikkumallugu Kalaallit Nunaat nunatut matoqqasuunngitsoq, Kristian Olsen napa.gl-imut oqarpoq. Aaju siusinnerusukkut taallanik oqaluttualiaaqqanillu katersanik oqaluttualianillu pingasunik saqqummersitsisarpoq.
Atuakkami atuartussaq Oslo, Holbæk, Qaqortoq, Nuuk, København Paamiullu aqqusaarlugit angallanneqarpoq. Nunanilu avannarlerni najugaqartut ataatsimooqatigiinerat Kristian Olsenip pingaartitarilluinnarpaa:
- Meeraaninni, inuusuttuuninni inersimasutullu inuuninni nunani avannarlerni najugaqarpunga, nunanillu avannarlernik pingaartitsineq tapersersortorujussuuara. Taamaattumik atuakkami pisuni eqqarsartaatsikkut nunani avannarlerni suleqatigiinnerup pingaarutaa ersersinniarpara, oqarpoq.
Atuagaq Kakiorneqaqatigiit naqiterisitsisarfik Atuagkat aqqutigalugit kalaallisut qallunaatullu septembarip arfineq-pingajuani saqqummerpoq.