"Kalaallisut oqalukkusukkaluarput, susoqanngilarli"

Oqaasileriffimmi siunnersortaaneq Per Langgård ima nassuiaavoq:

- Oqarsinnaavunga tunngaviusut arlaliusut. Siullermik nammineq inersimasuullunga aatsaat kalaallisut ilinnialerpunga, taamaattumik kalaallisut ilinniartitsinerit ilinniartitseriaatsillu iluatsitsivallaanngitsut assigiinngitsut naapissimavakka misilissimavakka. Assigiinngitsutigut malugalugu atuartinnerlunneqarsimallunga, misilittakkat taakku kusananngitsut maannakkut ilinniartut misilissanngilaat uanga ikiuussinnaaguma, oqarpoq.

Per Langgårdip sulinermi saniatigut ilinniut suliarisimavaa, namminiivillunilu isumassarsiaq ingerlassimallugu, aningaasat nammineq pini atorlugit- ilinniummut, una sapaatip akunnera saqqummersussamut katillugit 150.000 koruunit  atorsimanerarpai. Suliarlu amigaatilik anguniakkani annertusoq Per Langgårdip oqaatigaa:

- Tassa anguniagaq siullerpaaq, qallunaat tamarmik turistinullu allaat, kalaallit oqaasii, assersuutigalugit aqqit, kalaallisut oqaatsit qallunaatut oqaatsitut atortarlersut soorlu Inatsisartut, Naalakkersuisut Kalaallit Nunaat allallu taassallugit nalunanngitsuaraasut, tassaapput ilinniartikkusutakka, Per Langgård oqarpoq.

Ukiormanna Per Langgårdip programmeq kalaallisut paasisinnaasoq suliaraa. Ullumikkumi tamakku toqqaannartumik nutserussuteqanngimmat. Per Langgårdillu suliaani annertunerpaat ilagisimavaat "kukkuniaat" qarasaasiani kalaallisut allatsilluni atorneqartartoq.

Kalaallisut oqaloqqissaarnissamik ilinniut siullertut taasani ukiuni kingullerni Per Langgårdip sulinngiffeqaraangami ingerlattarsimavaa. Per Langgårdillu ilinniusiamini pingaartissimavaa tuluttoornermi ilinniartitsissutit tunngavii atorlugit kalaallisuumut ilinniartitsisoqartarnissa:

- Paasinarpoq aamma paasiniaasorpassuaqarpoq ilisimatoorpassuaqarlunilu tuluttoortitsinermi, suleqataasinnaasut ikiuussinnaasut siunnersuisinnaasullu. Kalaallisulli taamatut sulissagaanni sulisussaqanngilagut. Taanna pissutigalugu tuluttoortitsisut ilinniarfiginiaraluarpagut, taakkua tunngavia tassaasoq: oqaatsit oqaaserpassuit ilinniarniakkit, Per Langgård oqarpoq.

Ilinniut "Grønlandsk for voksne" una sapaatip akunnera saqqummersussaq, suliffeqarfinnut TELE Greenlandimut inissiaatileqatigiiffimmut INI Rambøllimullu tunineqareersoq Per Langgårdip oqaatigaa.

DVD ilinniut tuluttut qallunaatullu saqqummerpoq.