Kalaallisut oqaatsitta inissisimanerat nalilersorneqarli
Oqaatsitsinnik atuinitsinnik suliniutit nutaamillu eqqarsartarnissap amigaatigineqarnerata oqaatsivut navianartorsiortilersinnaavai. Kitaamiusut, tunumiutut avanersuarmiutullu oqaatsit ataannarnissaat tamatta immikkut akisussaaffigaarput. Inuit Ataqatigiit politikkikkut oqaaseqartartuata, Folketingimut Inatsisartunullu ilaasortap, Juliane Henningsenip, tamanna oqariartuutigaa. Naalagaaffiit Peqatigiit ilinniarnermut, ilisimatusarnermut kulturimullu suleqatigiiffiata, UNESCO-p, misissuinermini nutaami nunarsuarmi oqaatsit navianartorsiornerannik naliliinera Juliane Henningsenip taamaalilluni oqaaseqarfigaa. Kitaani oqaatsit navianartorsiortutut nalilerneqarput, tunumiutut avanersuarmiutullu oqaatsit navianartorsiorluinnartutut nalilerneqarlutik. - Taamaammat tamanna tunuliaqutaralugu kissaatiginartipparput, piffissaq manna atorluassagipput, nalilerlugulu oqaatsivut ullumikkut qanoq inissisimanersut, qanoq atorneqartiginersut, minnerunngitsumillu innuttaasut oqaatsitigut piginnaasaat maannamut nalilersorneqarsimanngitsut ukioq manna nalunaarsorlugit aallartittariaqartoq, Juliane Henningsen allappoq.
Inuiaqatigiinni oqaatsitta ilisimasassanut paasissutissanullu tamanut sakkuunerat taamaammat nukittorsartariaqarpoq, oqaatsivummi pisortatigoortumik oqaasinngormata tamatuma timitalernissaa akisussaaqataaffigaarput. Taamaammat oqaatsitta ilinniartitsissutitut nukittorsarnissaat sallerpaasariaqarpoq.
Naalakkersuisut oqaatsit pillugit annertusisamik ukiumi tullermiit iliuuseqarnissaat, qaammarsaanikkut, paasititsiniaanikkut oqallitsitsinertigullu, Juliane Henningsenip kajumissaarutigaa.
