Kalaallisut oqaatsit inatsisiliuunneqarlik
Kalaallisut oqaatsitta nunatsinni oqaatsitut pingaarnerpaanngortinneqarnissaat inatsisiliuunneqartariaqarpoq.
Siumut sinnerlugu Inatsisartuni ullumi oqaaseqartoq Lars-Emil Johansen taama isumaqarpoq. Oqaatsitta taama inatsisiliuunniarneqarnerat inuiaqatigiinni avissaartuunnermik kinguneqaannassannginnerluni. Tamatumunga Lars-Emil Johasen ima akissuteqarpoq:
-Pisariaqalersimanera malunnartorujussuuvoq, inuiaqatigiinni ilarpassuisa oqaatsigut atussallugit soqutigiunnaarsimasutut ippaat. Ilaannut pisariaarussimavoq, aali Kalaallit Nunaanniilluni, allaat Inatsisartuni aamma oqaatsit oqaaserinngisavut atorneqartalerlutik. Taamaattumik massakkut inuiattut ineriartoqqinnissatsinnut oqaatsivut illersussallugit pisariaqarpoq.
Lars-Emil Johansenili erseqqissaavoq, inuiannik allatut oqaasilinnik ajattuiniarnertut tamanna paasineqassanngitsoq.
- Ilinniarnissaannut periarfissinneqartariaqarput.
Lars-Emil Johansen isumaqarpoq kalaallit, kalaallisut oqaaseqanngitsut nunasisullu kalaallisut oqalussinnaanermut ilinniartinneqartariaqartut.
-Tamanna eqqortuliornerussagaluarpoq. Ilami eqqumiigineqanngisaannarpoq Danmarkimi Naalakkersuisut piumasaqartarmata Danmarkimut nuuttut tamarmik qallunaatut oqalussasut, araberiugunik, pakistanimiuugunik, syriamiuugunik, kalaaliugunik, kikkut tamarmik, taanna eqqumiigineqarneq ajorpoq.
Qallunaatut oqaasillit kalaallisut ilinniarnissaminnut tunngavissaqarsorinngippata tamanna ajornartorsiutaalissannginnersoq aperigatsinni akivoq:
- Suu. Isumaqarpunga aamma ikinngutivut qallunaat piumaffiginngippallaarivut. Kalaallit ikinnguteqartarnitsinni piumaffiginninnaveersaartarneq immaqa pivallaarparput. Ikinngutit aamma piumaffigisariaqarput ikinngutigiit naligiimmik inuusariaqarmata.
- Sunaana taamarsuaq nangiarigipput? Qallunaat kalaallisut ilinniarnissaat piumasarissallugu? Silarsuarmiut tamarmik allat piumasaraat oqaatsinik ilinniarneq. Tamanna qallunaanut qallunaatullu oqaasilinnut atuutsikkusupparput.
Namminersornerulerattali ukiut 26-inngorput. Oqaatsitta pingaarnertut atugaanissaanut inatsimmik Namminersornerulerattali piusaqarsimasinnnaanngikkaluarnersoq Lars-Emil Johansen aperaarput, akivoq:
-Namminersorneruneq Inatsisit paragraffiisa qulingiluaanni allassimavoq, kalaallit oqaasii oqaasiupput pingaarnerullutik oqaatsit. Ukiulli taakku ingerlaneranni suliaq ima allamut saaqattaartigisimavoq, kalaallisut oqaatsitta inatsisitigut allamik tunngavissiuunissaat, inatsisiliuunnissaat, periarfissaqarsimanani. Taamaattumik massakkut malittarisassaliornissaq kingusinaarpallaaranilu siusinaarpallaanngilaq.
Siumut sinnerlugu oqaaseqartup Lars-Emil Johansenip oqaatsitta pingaarnertut inatsiliunneqarnissaannik piumasaqarnera, Siumut partiimi akerleriinnik isumaqartoqarneranik ersersitsiinnartoq naalakkersuisooqatigiinnut illuatungiliuttut Demokraatit siulittaasuat Per Berthelsen nalilivoq:
-Pinngitsaaliiumaneq uagut anersaarinngilarput, uanilu Lars Emiilip oqariartuutaa illuinnaasioqisoq taamaattumik akuersaaruminaatsipparput. Aamma Siumukkut Lars Emiili oqaaseqartartorinngikkallaramikku oqariartuutigisartagaannut naapertuutinngimmat. Tassalu maanna qallunaat kalaallilu ataatsimoorlutik ataatsimiititaliarsua pilinngikkallarmat, nunatsinni piareersaataasumik ataatsimiititaliarsuup inassutaa, Siumullu illersortarsimasaa, allanngorluinnarmat, tassalu oqariartuut; oqaatsit qinersisinnaaneq qinigassanngortissinnaanerlu imminnut iperarsinnaanatik ataqatigiimmata, taamaattumik kialluunniit Oqaluttarfimmi nammineq oqaatsit toqqissisimaffigisani atorlugit oqalussinnaanera allanngortinneqassanngitsoq.
Per Berhelsen aamma tikkuaavoq, Nuup borgmesteria Agnethe Davidsen tusagassiuutini naqitani ilaatigut oqartoq tunngaviusumik atuarfik oqaatsit pingasut tunngavigagalugit ilinniartitsiviusoq piukkunnartikkini.
- Taamaattumik Siumumut kissaatigaarput erseqqissumik paatsoorneqarsinnaanngitsumik oqariartuuteqassasut partiitut suna uku pingasut taasama iluini illersornerlugu.
