Kalaallisut oqaatsit Folketingimi oqallissutigaat

Kalaallisut oqaatsit pillugit oqallinneq maannakkut aamma folketingimi ingerlanneqalerpoq, ilaatigut Dansk Folkepartiimeersoq Søren Espersen oqallinnermut ilanngulluni.

Anders Fogh Rasmussen-imut apeqquteqarnerminut ilaatigut ima allappoq:

Inatsisartuni naalakkersuisuutitaqartoq Siumut maannakkut siunnersuuteqarpoq, suliffeqarfiit Kalaallit Nunaanni angerlarsimaffeqartut tamarmik, kalaallinik aqutsisoqalissasut. Taamatut siunnersuuteqarneq Nunarsuarmi inatsisaasuni isumaqatigiissutaasunillu unioqqutitsinertut statsministerip nalilissannginneraa Søren Espersen aperivoq.

Søren Espersen-i isumaqarpoq, siunnersuut taamaattoq akuerineqassappat, nunarsuarmi kitaamiut ileqquinik uniuisoqassasoq, aammalu Nunarsuarmi inatsisaasunik isumaqatigiissutaasunillu unioqqutitsisoqassasoq.

Kalaallit Nunaat Naalagaaffeqatigiinnermut ilaammat Dansk Folkeparti isumaqarpoq, siunnersuutip piviusunnginnissaanut danskit statsministeriat akisussaaqataasoq.

Ulluinnaat arfinillit qaangiutsinnagit allakkat statsministerimiit akineqarnissaat naatsorsuutigineqarpoq.