Kalaallisut inuiaassuseq passimi allassimasalissasoq

Kalaallit passiini inuiaassuseq danskiusutut allassimaannartaraluarpoq. Inuiaassuserli maanna kalaaliusutut danskiusutullu siunissami allassimasalissaaq, Inatsiseqarnermut ministereqarfik paasissutissiivoq.
Peter Hummelgaardip kalaallisut inuiaassuseqarnerup passimut ilanngunneqarnissaanut periarfissaq inatsiseqarnermut ministereqarfimmut upernaaq misissoqquaa. Assi © : Ida Marie Odgaard/Ritzau Scanpix
decembarip 12-at 2024 13:07
Nutserisoq Connie Fontain

Inatsiseqarnermut ministerip, Peter Hummelgaardip kalaallisut inuiaassuseqarnerup kalaallit passiini allassimasunngortinneqarnissaanut periarfissaq ministereqarfiminut upernaaq misissoqquaa.

Kalaallit passiini inuiaassuseq danskiusutut ullumikkut allassimasarpoq.

Misissuineq tamanna naammassivoq, inatsiseqarnermullu ministerip tamanna tunngavigalugu kalaallit passiini kalaaliuneq danskiunerlu allassimasalissasoq, Naalagaaffiup politiivinut peqqussutigaa.

Inatsiseqarnermut ministereqarfik tusagassiuutinut nalunaarummi allappoq.

Kalaallit kulturiannik ersersitineq

Nutaarsiassarlu tamanna nunatsinni politikerit akornanni nuannaarutigineqarpoq.

- Inuiaassutsit kalaallit passiini maanna allassimasinnaalernera nunatsinnut innuttaasuinullu ineriartornermut pingaaruteqarpoq, isumaginninnermut, ilaqutariinnut, suliffeqarnermut nunamullu imminermut naalakkersuisoq, Jess Svane oqarpoq.

Nangipporlu:

- Pisortatigoortumik allakkani kalaaliusutut kinaassusilerneqarnissaaneq inuiaassusermut kisimi tunnganngilaq, nunattali kulturianik oqaluttuarisaaneranillu aamma ersersitsinerulluni.

Aki-Matilda Høegh-Damip Siumumeersup allannguut aamma ilassilluarpaa, taassumali nunatta passinut tunngatillugu oqartussaaffimmut nammineq piaartumik akisussaalernissaa neriuutigaa.

- Inuiaassuserput kalaallit passiini maanna aamma ersersinneqassaaq. Ilisarnaammik allannguineq tamanna Kalaallit Inuit kinaassusaannik akuerinninnerulernerullunilu ataqqinninneruvoq. Nunatta passimut atatillugu susassaqarfimmut akisussaaffimmik nammineq tigusinissaa alloriarnerup maanna tullerilissavaa, taanna oqarpoq.

Innuttaasunut saaffiginninnerit aallarniutaasut

Allannguineq namminiilivinnissamut alloriarnerullunilu kinaassutsimut qajannaallisaanerusoq, Jess Svane isumaqarpoq.

- Tamatuma saniatigut suliniut namminiilivinnerunissamut alloriarnertut aamma isigineqassaaq. Kalaallit Nunaata nammineq kinaassuseqarneranut aamma nunarsuarmi allami tamatumani takutitsisinnaatitaanissamut tapersiivoq.

Peter Hummelgaardip passimi allannguinissap maanna piviusunngornera nuannaarutigaa, taassumami inuiaassuseq kalaalerpassuarnut isumaqangaatsiartoq ilisimavaa.

- Tamanna paasisinnaalluarlugulu ataqqivara. Taamaattumik kalaallit passiini kalaaliuneq danskiunerlu allassimasalernissaa uannut isumassaqarluarpoq, inatsiseqarnermut ministeri oqarpoq.

Folketingimut ilaasortap, Aaja Chemnitzip IA-meersup allannguineq naalakkersuisut sulianut nunatsinnut attuumassuteqartunut tusarnaarnerannut takussutissaasoraa.

- Innuttaasumit saaffiginnissut innuttaasorpassuarnut inerneqarluarpoq. Tamanna danskit naalakkersuisuisa tusarnaarnerannut Inuit Ataqatigiillu Folketingimi sulianik qaqitsinerannut allannguisarnerannut takussutissaavoq, taanna oqarpoq.

Passimi allannguut 2024-p naannginnerani atuutilersinneqarnissaa naatsorsuutigineqarpoq.