Kalaallisut ilitsoqqussaralugu oqaatsinik atuartitsineq Danmarkimi amigaataasoq

Danmarkimi kommuninit illoqarfissuaqarfiusunit tallimaasunit kommuni ataasiinnaq meeqqanut atuartunut kalaallit oqaasiinik atuartitsinermik ingerlataqarpoq. Pisinnaatitaaffiginerata ilisimaneqannginnera ilaatigut pissutaasinnaasoq, peqatigiiffik isumaqarpoq.

Danmarkimi kommuninit illoqarfissuaqarfiusunit tallimaasunit kommuni ataasiinnaq - tassalu Aalborgip Kommunia - meeqqanut atuartunut kalaallit oqaasiinik atuartitsinermik ingerlataqarpoq.

KNR-ip Københavnip, Aarhusip, Odensep, Aalborgip Esbjergillu kommuniinut oqarasuaatikkut paasiniaanerata tamanna paasinarsisippaa.

AAMMA ATUARUK Tuluit oqaasiisa piorsarsimassuserput sunnissavaat

Tamannalu uggornartuusoq, Peqatigiiffik Kalaallit Meerartaannit oqaatigineqarpoq. Ilitsoqqussaralugimmi oqaatsit atuartitsissutiginissaat Danmarkimi inuiaqatigiinnut akuulernissamut pingaaruteqarpoq, suliniutinik aqutsisoq Jeppe Bülow Sørensen KNR-imut taama oqarpoq.

- Aamma kalaallisut kinaassuseqarnerup Danmarkimi attatiinnarniarnissaanut aqqutissaasinnaavoq. Tamannalu inuiaqatigiinnut danskinut pitsaasumik akuulernissamut pisariaqartutut isigaarput. Tassalu sorlaqarfiit ilisimanissaat, arajutsimannginnissaat tulluusimaarutiginissaallu.

Oqaatsinik ilitsoqqussanik atuartinneqarnissamut pisinnaatitaaneq

 

  • Danmarkimi kommunit pisussaapput meeqqanut angajoqqaamik aappaa EU-mi nunamit allameersuuppat imaluunniit Nunatsinneersuuppat Savalimmiuneersuuppalluunniit oqaatsiminnik ilitsoqqussaminnik atuartitsinermik pilersitsissallutik.
  •  Kommunit pisussaapput meeqqat ikinnerpaamik aqqaneq-marluk atuartitsinermut peqataaniarlutik nalunaarsimappata atuartitsinermik pilersitsissallutiki piukkunnartumillu atuartitsisoqartitsissallutik.
  • Kommuni atuartitsinermik pilersitsisinnaanngikkuni kommunimut sanilerisami atuarnissamut innersuussissaaq, kommunimi tassani oqaatsit pineqartut atuartitsissutigineqarpata.
  •  Kommunip pisussaaffigaa angajoqqaat meeqqamik oqaatsinik ilitsoqqussanik atuartinneqarnissaminnut pisinnaatitaaffeqarnerat pillugu ilisimatissallugit
  •  Naalagaaffiit Peqatigiit Meeqqat pillugit isumaqatigiissutaat naapertorlugu meeqqat inuiaqatigiinni ikinnerussuteqartuneersut ilitsoqqussaralugu oqaatsiminnik atuinissamut pisinnaatitaaffeqarput.

 

Najoqqutarisaq: Meeqqat atuarfianni oqaatsinik ilitsoqqussanik atuartitsineq pillugu nalunaarut aamma Naalagaaffiit Peqatigiit Meeqqat pillugit nalunaarutaat

Kommunit: Naammattunik saaffiginnittoqarneq-ajorpoq

Danmarkimi meeqqat atuarfianni atuartut marluinnik oqaasillit angajoqqaamik aappaa EU-mi nunamit allameersuuppat imaluunniit Nunatsinneersuuppat Savalimmiuneersuuppalluunniit oqaatsiminnik ilitsoqqussaminnik atuartinneqarnissartik pisinnaatitaaffigaat.

Atuartitsisoqassappalli kommuni atuartussat ikinnerpaamik aqqaneq-marluk katersussavai atuartitsisussamillu piukkunnartumik pissarsilluni.

Kalaallillu Danmarkimi najugaqartut 15.000-it 20.000-illu akornanniikkaluartut, Københavnip, Aarhusip, Odensep Esbjergillu Kommuniisa KNR-imut ilisimatitsissutigaat kalaallisut atuartitsinermik aallartitsinissamut angajoqqaanit imaluunniit atuartitsisussanit naammattunik ukiuni arlalinni saaffigineqartarsimanatik.

Københavnip, Aarhusip Esbjergillu Kommuniini ukiuni ikinnerpaamik qulini kalaallisut ilitsoqqussaralugu oqaatsinik atuartitsisoqarsimanngilaq.

Kalaallit Illuutaat Odensemiittoq kommuni suleqatigalugu atuartunut 2013-imi kalaallisut atuartitsinermik ingerlataqarsimagaluarpoq. Kommunili atuartut arfineq-pingasuutillugit atuartitsinissamut immikkut akuerineqarsimagaluartoq pisinnaasimanngilaq, Odensemi Kalaallit Illuutaanni pisortaq, Kirsten Mærsk, taama ilisimatitsivoq.

AAMMA ATUARUK Ilitsoqqussaralugu oqaatsinik atuartitsineq misissorneqalersoq

Ilisimaneqarnissaa ilisimatitsissutiginissaalu amigaataasut

Nalunaarut naapertorlugu ”kommunalbestyrelsip” oqaatsinik ilitsoqqussanik atuartitsinissamut periarfissaqarnera angajoqqaanut ilisimatitsissutigisussaavaa.

Kommunilli atuarfeqarnermut ingerlatsivii tassaapput kommunip nittartagaatigut atuarfinnillu ataasiakkaani periarfissaq pillugu ilisimatitsisartut.

Jeppe Bülow Peqatigiiffik Kalaallit Meerartaanneersoq naapertorlugu, atuartitsinermut peqataarusulluni nalunaartoqartannginnera angajoqqaat ilisimasaqannginnerannik kommunillu tungaanit ilisimatitsisoqartannginneranik pissuteqarpoq.

AAMMA ATUARUK Afdelingsleder oplever fagligt svage studerende

- Isumaqanngilanga iluarineqannginnera pissutaasoq. Piumaneqarnera erseqqissumik nalunaarutigineqarnersoq, katersuisoqarnersoq amerlasuullu perusunnerisa (kalaallit oqaasiinik ilitsoqqussaralugu atuartitsinermut, aaqq.) erseqqissaasoqarnersoq apeqqutaasoraara, Jeppe Bülow oqarpoq.

Danmarkimi Meeqqat pillugit siunnersuisoqatigiit nalunaarusiaminni ukioq manna septembarip qaammataani saqqummersitaminni Danmarkimi kommunit kaammattorpaat kalaallit oqaasiinik ilitsoqqussaralugu atuartitsinermik aallartitseqqullugit, ilaatigut najukkami kalaallit peqatigiiffii suleqatigalugit.

AAMMA ATUARUK Kalaallit meerartaat Danmarkimiittut oqimaattorsiortut

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat