Kalaallisut ilinniartitsinerup pitsaassusaa misissorneqalerpoq
- Kalaallisut ilinniartitsinermut atatillugu innersuussuteqarnissarput pillugu misissuinialerpugut, kalaallisut ilinniartitsinerup qanoq iliornikkut pitsanngorsarneqarsinnaanissaa paasiniarneqassalluni, Inerisaavimmi naliliisarfiup aqutsisua Ellen Jensen Karlsen nittartakkamut folkeskolen.dk-mut oqarpoq.
Atuarfinni kalaallisut ilinniartitsisarneq 2006-imili nalilersorneqartuartarpoq, misissuinerlu pineqartoq tamatuminnga nangitsinerulluni.
- Atuartut misissuiffigineqartarnerat ilinniartitsisut ilaannit apeqquserneqarpoq. Taamatut isumaqarneq allanngortittariaqarpoq, meeqqammi ilinniarusupput, Ellen Jensen Karlsen oqarpoq.
Meeqqat kalaallisut danskisullu angerlarsimaffimminni oqaluttut kalaallisuinnaq oqaluttunut naleqqiullugu angusarissaartarnerannut suut tunuliaqutaanersut aamma paasiniarneqassaaq.