Kalaallisut atuakkiat tuluttuunngortinniarneqalerput

Ilisimatusarfittaami siulersuisunut ilaasortaq, Marianne Stenbæk, ima oqaluttuarpoq:

- Tassa siullertut suliniutigilerparput kalaallisut atuakkiat immaqa 20-t tuluttuunngortinniarlugit. Eqqarsaammut tunuliaquterput tassaavoq, inuit paaserusukkaanni, aamma nuna najugaat qanoq ittuunersoq paaserusukkaanni, ilaallu ilanngullugit, taava tamakkununnga tunngasut atuassallugit pisariaqartarpoq, ilaa? Atuarsinnaagaannimi paasisat annertunerusarput. Inuppassuimmi isumaqarput kalaallit atuakkiaat tassaaginnartut oqaluttuat imaluunniit oqaluttuatoqqat , kisianni ilaa taamaattoqanngilaq, taamaammat atuakkianik kalaallisuunik tuluttut nutserititsiniarpugut, Marianne Stenbæk oqarpoq, nangipporlu:

- Soorunami qanganitsanik ilaqassapput, kisianni tassa ukiuni 50-ini-hornorujuni kingullerni pisimasut ilanngunnissaat pingaartittorujussuuvarput, Kalaallit Nunaanni ukiuni kingullerni susoqarsimanera inuit paasilluarsinnaaniassammassuk, malinnaavigalugulu, Marianne Stenbæk oqaluttuarpoq.

Aperaarpullu tuluttut nutsikkanik saqqummersitsiniarnerannut suna tunuliaqutaanersoq, akivorlu:

- Anguniagarput tassaavoq Kalaallit Nunaat, imaluunniit naggueqatigiit Inuit, pillugit paasisimasallit suli amerlanerulernissaat, Kalaallit Nunaammi ukiuni qulini 15-ini soqutigineqaraluttuinnarsimavoq, atuakkanillu tuluttuunik i8luamik soqanngilaq, ilisimatusarnermut tunngasut ilanngutassiallu Kalaallit Nunaannut tunngasut eqqaassanngikkaanni, ukunanilu saqqummersinniakkatsinni inuiaqatigiit kalaallit sammineqassapput, tassalu tuluttut oqaasilinnit atuarneqarsinnaassallutik.

Atuagaq siulleq saqqummersinneqartussaq tassaavoq H.C.Petersenip atuakkiaa Kalaallit Nunaanni pisuussutit uumassusillit.