Kalaallisut atuakkat oqaatsitsinnut pingaaruteqaqaat
-Taamaalluarsinnaavoq, kisianni taassuma ajornartorsiut iluarsinavianngilaa imaluunniit ajorseriartinnaviarnagu. Eqqartorpavut kulturitsinnut, oqaatsitsinnut atuarnerullu pingaassusianut tunngassuteqartut, Hans Peter Poulsen oqarpoq.
Atuakkiorfik atuagaaterpassuaqaraluarpoq, taakkuli ilarpassui atuarfeqarfinnit pisiarinagit ullumikkut kopiiginnarneqartarput.
- Taamatut ingerlasoqartillugu atuakkiorneq, atuagaateqarneq atuakkanillu tuniniaaneq akilersinnaalernavianngilaq, siulersuisuni siulittaasoq nangippoq.
Kalaallit oqaasii atorlugit atuakkiat aamma atuarneqanngippata saqqummersitsisarfiup iluaqutigilernavianngilai.
-Taamaallaat oqarsinnaalissaagut oqaluttuarisaanermi kingumut uterluta aakua atuakkiarineqarsimasut. Atuakkat aatsaat naleqalersarput atuarneqaraangamik, taamaammat uninngasuutivut pisiarineqarsinnaanngitsut iluaqutigilernavianngilavut. Oqaatsitsinnut pingaaruteqartorujussuuvoq atuakkakkanik atuartalernissaq, kalaallisuunik aamma, Hans Peter Poulsen erseqqissaavoq.
Sunamiuna kukkussutaasimasoq? Apereqqipparput.
-Namminersornerullutik Oqartussanit sakkortuumik ukiuni kingullerni aqutsiniarsarineq, atuakkanut tapiissutinik annikillisaaneq, tapiissuteqarfigineqartartullu ataqatigiinngiusattorsuarmik saqqummersinneqartarnerat ajornartorsiutaalersimavoq, oqarpoq.
Ataqatigiissaakkamik nunatta iluaqutigisinnaasaanik aaqqiissuteqartortariaqartoq oqaatigaa, oqarluni pingaaruteqartorujussuusoq ammasumik eqqartuinissaq.
- Uagut-una taamaaliortugut pissutigalugu suliffeqarfik akisussaassuseqartumik ingerlatsissappat ineriartussappallu allatut ajornartormik ukua imminnut akilersinnaanngitsutut isikkullit pingaaruteqaraluarpataluunniit peertariaqaratsigik, Hans Peter Poulsen oqarpoq.
Apeqqutaaginnalernerarpaa susoqassanersoq.
- Naalakkersuisuninngaanniit, politikerininngaanniit aamma Kalaallit Nunaanninngaanniit.
Atuakkiorfik A/S Toornaq Consulting ApS-imit Namminersornerullutik Oqartussanit 2005-imi pisiarineqarpoq.
Atuakkat kalaallisut oqaasertallit qallunaatuuniit ullumikkut tunineqannginnerusarput.
- Atuakkat siornatigut 1.500-nngorlugit naqitertakkat maanna 600-nngorlugit naqitertinneqartarput, taamaakkaluartoq nungullugit tunineqarsinnaaneq ajortut, pisortaq Nukaraq Eugeniut oqarpoq.
Pissutsit iluarsissappata sullissinermut saqqummersitsisarfinnut isumaqatigiissusiortarneq
Namminersornerullutik Oqartussanit eqquteqqittariaqarsoraa.
Kultureqarfimmut naalakkersuisoqarfimmit oqaaseqartitsiniaraluaratta iluatsitsinngilagut, naalakkersuisorli Tommy Marø aqagu oqaaseqarumavoq.