Kalaallisuinnaq oqaasillit oqalliseqataasinnaanngillat

Kalaallit Nunaanni oqaatsivut tassaapput kalaallisut oqaatsit, sapangiinnarneqarpulli, Aleqa Hammond oqarpoq.

Naalakkersuisut apriilip aallaqqaataani angallanneq pillugu ataatsimiititaliarsuup isumaliutissiissutaa innuttaasunut tamanut saqqummiuppaat qallunaatulli taamaallaat allaqqalluni.

Kalaallit Nunaanni pisortatigoortumik oqaativut, tassa kalaallisut sapangiinnarneqartut Aleqa Hammondimit oqaatigineqarpoq.

- Isumaqarpunga inatsimmik Naalakkersuisut malinnittussaaffimminnik malinninngitsut.

Tassa qanoq?

- Naalakkersuisut pisussaaffigaat, pisortatigoortut oqaatsit atussallugit. Tassalu, kalaallisut. Taamaammat pisortatigoortumik oqaatsivut atortussaagaluarpaat.

Tassa kalaallit oqaasii sapangiinnarneqarput?

- Aap, Aleqa Hammond oqarpoq. 

Siumup siulittaasua Aleqa Hammond Inatsisartut suleriaasiat paragraf 37 naapertorlugu, Naalakkersuisunut apeqquteqarpoq sooq isumaliutissiissut kalaallisut allaqqannginnersoq akissutissarsiniarlugu.

Naalakkersuisut maanna nunatta avannaanut angalapput, angallanneq pillugu isumalioqatigiissitap inassuteqaatai innuttaasut qanoq isumaqarfigineraat pillugu tusarniaajartorlutik. Isumaliutissiissutip tamakkerluni suli kalaallisut saqqummersinneqarsimannginnera pillugu Aleqa Hammond ima oqarpoq:

- Kalaallisut oqaluttunik ataatsimiisitsisoqarniarpat, soorunalimi pissusissamisoorpoq atuagassaat aamma kalaallisuujussasut. Aamma isumaqarpunga innuttaasunut ataatsimiisitsisoqassappat, innuttaasut ataatsimiigiarusuttut takusinnaasariaqaraat sunarpiaq ataatsimiissutigineqassanersoq, taamatullu aamma Naalakkersuisut oqaasissaat innuttaasut nalussanngikkaat, Aleqa Hammond oqarpoq.

Angallannermut Naalakkersuisumit Jens. P. Frederiksenimit ajuusaarutigineqarpoq, isumalioqatigiissitap allakkiarsua suli nutserlugu naammassineqanngimmat. Oqaatigalugulu piffissami qaninnerpaami, allakkiap quppernernik 500-nik amerlanerusunik quppernillip naammassineqarnissaa, maannalu aamma naammassisarneqaleruttortoq naqissuserlugu.