Kalaallisuinnaq oqaasillit angusalunnerupput

Meeqqat angerlarsimaffimminni kalaallisuinnaq oqaasillit, atuarfimmi fagini atuartitsissutini qallunaatut, tuluttut, matematikkimilu angerlarsimaffimminni qallunaatut oqaluttuniit angusalunnerupput.

Kisitsit annertuginarsinnaasoq tassaavoq meeqqat atuarfianni atuartut 71 procentii kalaallisuinnaq angerlarsimaffimminni oqaluttuunerat.

Tamanna Inerisaaviup nalilersuisarfiani nuna tamakkerlugu 3. klasseniit 7. klassenut misissuinermi paasineqarpoq.

Ilinniartitsisut Meeqqat Atuarfianniittut Kattuffianni IMAK-imi siulittaasoq Sivso Dorph oqarpoq, misissuineq assigiinngitsunik takutitsisoq.

- Nunaqarfiit illoqarfiillu sanilliutissagutsigit illoqarfinni atuartut allamiut oqaasiinut, soorlu qallunaat tuluillu oqaasiinut pikkorinnerupput. Kisianni kalaallit oqaasiini matematikkimilu angusat, nunaqarfimmiuugaanni illoqarfimmiuugaannilu imminnut naligiipajaarput, nassuiaavoq.

Misissuinerup takutippaa nunaqarfimmiut meerartai illoqarfimmiuniit pikkorlunnerunngitsut, nunalli allat oqaasiinut kinguarsimanerusut.

- Tupaallannartua uaniippoq, nunaqarfinni illoqarfinnilu matematikkimi angusat assigiikannerput, suulli pissutaanersut akiuminaatsittorujussuuara, IMAK-ip siulittaasua Sivso Dorph oqarpoq.

Misissueqqissaartunit siunnersuutigineqarpoq trinini siullerni (minnerni) ilinniartitsisut meeqqat sungiusimanarteriigaat minnerpaamik ataaseq, arlallilluunniit trininut tulliuttunut (akullernut angajullernullu) malinnaatinneqartalissasut, tamannalu IMAK-ip siulittaasuata isumassarsiatsialattut isigaa.

Misissuinerit takutippaat atuartut angusaat 7. klassemiit ajorseriartartut. Taamaammat Sivso Dorph isumaqarpoq timelærerit pikkorissartinneqartarnerat pisortanit sumiginnarneqartoq.

- 300-t sinneqartunik ilinniartitsisussaaleqiuaannarnikuuvugut, pissutsillu taamaakkallartillugit isumaqarpunga, atuarfinnik ingerlatsisut pikkorissaanerit aalajangersimasumik aaqqissuunnissaannut akisussaaffik tigusariaqaraat, IMAK-ip siulittaasua Sivso Dorph oqarpoq.

Misissuinerup aamma takutippaa niviarsiaqqat atuagarsornikkut nukappiaqqaniit ingerlalluarnerusartut, taamaattorli assassornikkut ilinniakkani angutit ingerlalluarnerusartut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat