Kalaaleq 18-inik ukiulik ulluni 24-ni parnaarunneqarallartussanngorpoq nunarsuarmi tilluuttartutut pissartaasimasumut Johnny Bredahlimut persuttaasimanini pillugu.
18-inillu ukiulik persuttaarujussuarnermut pisuunnginnerarsimavoq.
Suliap misissorneqarnissaa tunngavigalugu eqqartuussinerup matoqqasuunissaa unnerluussisumit piumasarineqarsimavoq. Oqaatigineqarporlu minnerpaamik angut ataaseq alla persuttaaqataasimasutut ujaarineqartoq.
Unnerluussisup oqarnera naapertorlugu 18-inik ukiullip Johnny Bredahl puiaasamik miloqqaarsimavaa, taamaalillutillu persuttaaqannilu Johnny Bredahl arlaleriarlugu isimmittalersimallugu.
Københavnimi politiit kalaaleq 18-inik ukiulik ilaquttaminiittoq ippassaq tigusaraat, tigusaagamilu persuttaanermi nalaani atisat atukkani suli aattaqaqisut atorsimagai oqaatigineqarpoq.
Aviisip Ekstra Bladet-p allaaserisaa naapertorlugu angut kalaaleq eqqartuunneqarami eqqissiveqarsimanngeqaaq nissunilu aalatiinnaavissimallugit. Angut kalaaleq Danmarkimi najugaqartuunngilaq tikeraaginnarsimallunilu.
Johnny Bredahl julefrostereerluni angerlartillugu sapaatiummat ullaakkut arfininngulersoq Strøget-mi angutinit inuusuttunit unitsinneqarpoq kingornalu arlalippassuariarluni isimmittarneqalerluni.
Tamanna kiinaata napititerneranik kinguneqarpoq taamalu kiinaa ilisarnarunnaarluni pullarujussuarluni. Politiit oqaluttuarnerat naapertorlugu takunnittut oqaluttuarsimapput tilluuttartuusimasup persuttaasoqarnissaa unitsinniarsimagaluaraa.
Johnny Bredahl nammineerluni affarmik kalaaliuvoq arnaa kalaaliugami.