Kalaallip meeqqanut atuakkiaa nunat avannarliit atuakkiortumut nersornaasiuttagaanut innersuunneqartoq

Kathrine Rosingip meeqqanut atuakkiaa Nasaq teqqialik piginnaanilik, Nina Spore Kreutzmannimit assiliartalersorneqarsimasoq, Nunat Avannarliit Siunnersuisooqatigiiffiata meeqqanut inuusuttunullu atuakkiortumut nersornaasiuttagaanut innersuunneqarpoq.
Allattoq mlk, Simon Uldum
marsip 27-at 2014 06:07

Nersornaasiuttakkamut pilersinneqaqqammersumut atuakkat innersuunneqartut 13-it ippassaq avammut nalunaarutigineqarput. Tamannalu Bolognami nunat tamalaat atuakkanik saqqummersitsineranni pivoq.

- Nasaq teqqialik piginnaalinik meeqqanut atuakkiaavoq angukkuarnermut tunngasoq, aammali piviusorpalaartuuvoq inuullu itsarsuarli pigisaanik sammisaqarfiulluni. Inersimasut atuffassisut meeqqat qanoq tatiginnissinnaatiginerinik eqqaasinneqarnissaat ilimanarluinnarpoq, Nunat Avannarliit Siunneruisooqatigiivi taama allapput.

Manu aqqanilinnik ukiulik atuakkami malittarineqarpoq. Taanna teqqialimmik sissami nassaarpoq. Sunaaffa kinamiup nukappiaqqap Miop pigisimasaa, teqqiallillu taassuma nukappiaqqat taakku marluk sinnatuminni atassuteqatilerpai.

Nersornaasigassatulli innersuunneqartoq unammillerteqarluarpoq. Danmarkimit Louis Jensen aamma Lilian Brøgger og Hanne Kvist innersuunneqarsimapput. Finlandimit Annika Sandelin, Karoliina Pertamo, Ville Tietäväinen aamma Aino Tietäväinen. Islandimit Andri Snær Magnason aamma Lani Yamamoto. Norgemit Gro Dahle, Kaia Linnea Dahle Nyhus, Håkon Øvreås aamma Øyvind Torseter. Sverigemit Eva Lindström aamma Sofia Nordin. Savalimmiunit Bárður Oskarsson, Saamillu nunaanniit Máret Ánne Sara.

Nunat Avannarliit Siunnersuisooqatigiiffiata meeqqanut inuusuttunullu atuakkiortumut nersornaasiuttagaa siorna siullerpaamik tunniunneqarpoq, finlandimiut Seita Vuorela aamma Jani Ikonen nersornaaserneqarlutik. Nuka Godtfredsenip atuakkiaa Ukaliatsiaq Nunatsinnit siorna innersuunneqarpoq.

Juaaka Lyberthip atuakkiaa Naleqqusseruttortut atuakkiortumut nersornaasiuttakkamut innersuunneqartoq nalunaarutigineqareerpoq. nersornaasiuttakkalli sinnerinut pingasunut, tassalu Pinngortitaq avatangiisillu pillugit nersornaammut, filmiliortumut nersornaammut nipilersortartumullu nersornaammut innersuunneqarsimasut suli avammut nalunaarutigineqarsimanngillat.

Nunat avannarliit nersornaasiuttagaat Nunat Avannarliit Siunnersuisooqatigiiffiata ataatsimiinnera ukiut tamaasa tunniunneqartarput, ukiormannalu Stockholmimi oktobarip naanerani tamanna pissaaq. Nersornaat 350.000 koruuninik aningaasartaqarpoq.