Kalaallip filmiliaa Cannes-festivalimi takutinneqassaaq
Maria B. Kreutzmann Titartakkanik Filmiliornermut Ilinniarfimmi, tassa Animationsskolemi, Viborgimiittumi, ilinniartuuvoq, tassanilu soraarummeerutaasumik filmiliaata, titartakkanik filmiliat allat 1.700-t peqatigalugit, Frankrigip kujasissuani, Cannesimi, filmfestivalimi, maajip ulluisa 16-ianniit 27-ata tungaanut pisussami, tassa takutinneqartussanngorpoq, taama Sermitsiaq.ag allappoq.
Filmi tuluttut taaguuteqarpoq "Slug Invasion" - "Siuteqqut Tiguaanerat"-nik kalaallisut nutsersinnaasarput.
Taanna ilinniartunit qulingiluanit filmiliarineqarpoq, filminillu nunarsuaq tamakkerlugu naliliisartunit nuannarineqartorujussuuvoq.
Qarasaasiakkullu "Slug Invasion" ujaraanni, filmip taassuma, siuteqqut tiguaanerannik sorsuttulersaarutip, minutsinik arfinilinnik sivisussusillip, assitai arlallit takuneqarsinnaapput.
- Siuteqqunut aalajangersimasunut, ulorianartunut, dræbersneglinik taaneqartartunut, filmiliaq tunngasuuvoq. Siuteqqut amerlasoorsuanngorlutik arnap utoqqaap naatsiivianik saassussiniarput, sunalu tamaat atorlugu akiorniarneqarput. Filminut sorsuttulersaarutinut, qanoq imalinnik nalunngisatsinnut, filmi nersuiniaataavoq, Maria B. Kreutzmann Sermitsiaq.ag-mut oqarpoq.
- Filmiliarpulli minutsinik arfiniliinnarnik sivisussuseqarpoq, Maria B. Kreutzmann, eqqissisaavoq, filmiliamillu Cannesimi maajimi iluatsitsilluarnissaa akissarsisinneqarnissaalu neriuutigalugu.