Daniel Chartier aamma Kelly BerthelsenAssi: KNR

Kalaallip atuakkiaanik Parisimi saqqummiussineq soqutigineqarluartoq

Kalaallit atuakkiaat Parisimi qanittukkut immikkut sammineqarput. Atuakkiortup Kelly Berthelsenip atuakkiani franskisuunngorlugu saqqummersinneqartoq Champs Élyséesimi Danskit Illuanni ilisaritippaa.

Atuakkiortup kujataamiup Kelly Berthelsenip atuakkiaminik Parisimi sapaatit-akunnerata siuliani saqqummiussinera iluatsilluarpoq.

Kalaallit atuakkiaat, nammineq suliani atuakkiornerullu inooqataanikkut qanoq sunniuteqarsinnaanera pillugu oqalugiarnera inuit 100-t sinneqartut tusarnaariarpaat. Oqaluttualiaaqqanik katersaanik atuakkiaq franskisuunngorlugu Quebecs University Pressimit saqqummersinneqaqqammerpoq.

Aamma atuaruk Kalaallit atuakkiaat Parisimi sammineqalersut

Atuakkamik saqqummiussineq professorip Montrealimeersup Daniel Chartierip Karen Langgaard Ilisimatusarfimmeersoq aamma filimiliortartoq Jean-Michel Huctin Uummannami najugaqarsimasoq peqatigalugit suliniutaata ilagaa.

Atuakkap tallimanngormat unnukkut saqqummiunneqarneranut atatillugu Jean-Michel Huctinip oqaatigaa kalaallit atuakkiaasa oqaatsit allat atorlugit atuarneqarsinnaasunngortinnissaannut alloriarneq siulleq pisoq, taamaaliornikkut kalaallit nipaat nunarsuarmi sumiiffinni allani tusarneqarsinnaalersinneqassammat. Kalaallit Nunaata Danmarkillu avataanni kalaallit kulturiallu ilisimasaqarfiginerulernissaat pisariaqartinneqartoq Jean-Michel Huctinip tusarnaarianut oqaatigaa.

Aamma atuaruk Kalaallit atuakkiaat pingasut franskisuunngorlugit saqqummersinneqartut

Daniel Chartier KNR-imut oqarpoq inuit issittormiuusut tusagaqarfiginissaat aammalu kalaallit inuiaqatigiit kulturertillugu pillugit qanoq oqaasissaqarnersut tusassallugu qanoq pingaartigisoq atuakkamik saqqummiussinermi naqissusersimallugu.

Parisimi Danskit Illuanni aaqqissuussineq Issittup Siunissaa ulluni makkunani ingerlanneqarpoq, Kelly Berthelsenillu atuakkamik saqqummiussinera Kalaallit Nunaat pillugu nittarsaassisoqarnerata ilagaa.

Aamma atuaruk Berthelsenip, Storchip Lyngellu atuakkiaat franskisuunngorlugit saqqummersinneqalersut



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl