Kalaallinut suliniutit unitsinneqariaannaapput
Isumaginninnermut ministerip Benedikte Kiærip Folketingip Kalaallit Nunaannut tunngassuteqartunut ataatsimiititaliaa ullaaq ataatsimeeqatigererlugu taama ilisimatitsivoq, Sermitsiaq.ag taama ilisimatitsivoq.
IA sinnerlugu folketingimi ilaasortap Sofia Rossenip Danmarkimi naalakkersuisut apeqquteqarfigigamigit paaseruppaa, Danmarkimi Kalaallit Illuuttaanni sisamani suliniutit inunnik isumaginninnermut tunngasut immikkut ittut aningaasaliiffigiumaneraat.
- Suliniutit ingerlareersut kalaallinut atugarliortunut Danmarki tamakkerlugu iamerlajaarsuusunut tunngasut, soorlu angerlarsimaffeqanngitsunut tunngasut, ingerlaqqinnissaanut aningaasaliinissat pissanersut paaserusussimavara, Sofia Rossen, Julie Henningsenimut erninermut atatillugu sulinngiffeqartumut taartaasoq oqarpoq.
Sermitsiaq.ag-mi allaaserisaq naapertorlugu, kalaallinut atugarliortunut 1.500-nut aningaasaliissutit ukiumut 2 millioni koruuniusimapput. Aappaagumiilli 2011-miit taakku peerneqassapput.
Isumaginninnermut ministeri taarsiullugu kommuninut innersuussivoq.
- Kommunit namminneq akisussaaffigaat kalaallinut suliniutit taperneqartarnissaat taperneqartannginnissaalluunniit. Assersuutigalugu oqaatigisinnaavara Københavnip Kommunea suliniutinut atatillugu aningaasaliissutini tamakkerlugit atorsimanngimmat, 81 millioni koruuninillu sinneqartoorluni. Tulleriissaarinerat apeqqutaasorujussuuvoq, Isumaginninnermut ministeri nassuiaavoq.
Kofoeds Skolemi kalaallit naapittarfiat, Naapiffik, Københavnip ilaani Vesterbromiittoq ingerlaavartumik aningaasaliiffigineqarnikuuvoq, illuatungaanili naapittarfik Qiperoq, Københavnimi Kalaallit Illuutaannit ingerlanneqartoq aningaasassaaleqilluni.
