Assi: Lisa Risager/Flickr Creative Commons

Kalaallinut inooqataanikkut ajornartorsiortunut aningaasaliissutit attatiinnarneqartut

Danskit naalagaaffiata satspuljemik aaqqissuussinera atorunnaarsinneqaraluartoq, Danmarkimi kalaallinut inooqataanikkut ajornartorsiortunut aamma kalaallit meerartaannut inuusuttaannullu suliniutinut aningaasaliissutaasartut attatiinnarneqassapput.

Danmarkimi kalaallinut inooqataanikkut ajornartorsiortunut suliniutaagallartut Danmarkimi satspuljemit aningaasaliiffigineqartartut eqqugaassanngillat – imaluunniit eqqugaassanngikkallarput.

AAMMA ATUARUK Satspuljemidler er ikke indireke bloktilskud

Folketingimi amerlanerussteqartut satspuljep atorunnaarsinneqarnissaanik aalajangernerisa kingorna tamanna paasinarsivoq. Aningaasaliissutaasartut ukiumut 1 milliard koruunit missaanniittartut ilaat Danmarkimi soraarnerussutisiat qaffaaviginissaannut atorneqassapput.

Satspulje

Satspulje 1990-imi pilersinneqarpoq.

 

Aningaasat puljemiittut ikiorsiissutineersuupput, soorlu assersuutigalugu aningaasatigut ikiorsiissutinit.


Partiit satspulje pillugu isumaqatigiissuteqartut aningaasat puljemeersut ukiumut 1 milliard koruunit missaanniittartut qanoq agguaanneqassanersut 1990-imiilli oktobarip qaammataani isumaqatigiinniutigisarpaat.

Venstrep, Konservative Folkepartiip, Liberal Alliancep aamma Dansk Folkepartiip 2019-imi Folketingimut qinersisoqarpat isumaqatigiissut peqataaffigiunnaassavaat. Taamaalillunilu satspulje pillugu amerlanerussuteqartoqarunnaassaaq atorunnaarsinneqassallunilu.

Folketingimi partiit nunatsinneersut satspulje pillugu isumaqatigiissut peqataaffiginngilaat.

Danmarkimi innuttaasunut inooqataanikkut ajornartorsiortunut suliniutit satspuljemit 1990-imiilli piffissami killilikkami tapiiffigineqartarput. Aamma kalaallinut inooqataanikkut ajornartorsiortunut suliniutit arlaleriarlutik aningaasaliiffigineqarsimapput. Ilaatigullu Kalaallit Illuutaasa kalaallit Danmarkimut nooqqammersut pitsaasumik inuuneqalernissaannut ikiuillutik suliniutaannut 2017-imiilli aningaasaliisoqartarpoq.

Aamma Namminersorlutik Oqartussat nunatsinni meeqqat inuusuttullu suliniuteqarfiginerisa nukittorsarnissaanut 2017-imiilli ukiumut ikinnerpaamik 2,2 millionit koruuninik aningaasaliiffigineqartarput.

Namminersorlutik Oqartussanut aningaasaliissutit pilersaarutaareersutut 2020-p tungaanut aamma attatiinnarneqassapput. Aamma Danmarkimi kalaallinut inooqataanikkut ajornartorsiortunut tapiissutit ukiut sisamat ingerlanerini katillugit 36,4 millionit koruuniusussat 2020-p tungaanut attattiinnarneqassapput.

AAMMA ATUARUK Isumaqatiginniarnissamut sooq ilaasinnaanngilagut

Isumaginninnikkut suliniutit satspuljemit ullumikkut tapiiffigineqartartut ilaat Danmarkimi aningaasanut inatsimmit 2020-mit aningaasaliiffigineqartalissapput, aningaasanilli aamma sillimmateqartoqassaaq, taakkulu peqatigiiffinnit suliniutaagallartunut qinnuteqaateqarfigineqarsinnaassapput, danskit isumaginninnermut ministeriat Mai Mercado (K) nutaarsiassaqartitsivimmut Ritzauimut taama oqarpoq:

- Peqatigiiffinnut qinnuteqaateqartartunut allanngutaavallaassasorinngilara, aningaasanimmi sillimmatissanik immikkoortitsisoqassaaq taakkununngalu qinnuteqaateqarsinnaassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat