Kalaallinut Aarhus Universitetshospitalimi uninngasunut immikkoortortaq allilerneqassasoq

Kalaallinut tarnikkut napparsimasunut Aarhus Universitetshospitalimi immikkoortortamik alliliineq Kalaallit Nunaata peqqinnissaqarfianut ikinnerpaamik 1,5 millionit koruuninik akeqassaaq.

Allattoq Helle Nørrelund Sørensen

marsip 03-at 2025 11:18

Nutserisoq Mads Lynge

Kalaallinut tarnikkut napparsimasunut Aarhus Universitetshospitalimi immikkoortortami, R3-mik taaguuteqartumi, inissaalatsitsipput.

Uninngasunut immikkoortortap tamanna pissutigalugu allilerneqarnissaa Kalaallit Nunaanni Peqqinnissaqarfiup Danmarkimi nunap immikkoortuanut Region Midtjyllandimut kissaatigisimavaa. Inissat maanna 16-iusut 17-inngortinneqarnissaat kissaatigineqarpoq.

Region Midtjyllandimi Tarnikkut nappaatilinnut isumaginninnermullu ataatsimiititaliap pingasunngornermi ullormut oqaluuserisassaanni tamanna takuneqarsinnaavoq.

Aamma atuarukTilioq tarnikkut nappaatilinnut immikkoortortaqarfik pillugu nalunaarusiamut qisuariartoq: Ukiorpassuarni suaarutigisarpagut

- Suleqatigiinnissamut isumaqatigiissuteqarpugut, maannalu tamanna kissaatigineqarpoq, ataatsimiititaliamilu oqaluuserisussanngorparput, Else Søjmark(S), Region Midtjyllandimi tarnikkut nappaatilinnut isumaginninnermullu ataatsimiititaliami siulittaasoq oqarpoq.

Siunnersuut akuersaartumik isigalugu ilanngullugu oqaatigaa.

Tarnikkut nappaatilinnut immikkoortortaq, R3, kalaallinut tarnikkut nappaatilinnut sullissinermut immikkoortitaavoq.

Immikkoortortaq 16-inik maanna inissaqarpoq, inissanulli 17-inut maanna allilerneqarniarluni.

Kalaallit tarnikkut nappaatillit 16-ileereersut immikkoortortami uninngasinnaapput.

Kalaallit immikkoortortami uninngasut tassaasinnaapput:

- paarineqartussanngortinneqarlutik Kalaallit Nunaanni eqqartuussiveqarfinni pineqaatissinneqarsimasut

- nuunneqartariaqartut

- tarnikkut misissorneqarneq aallaavigalugu immikkoortortami unitsinneqartussanngortinneqartut

- immikkoortortami matoqqasumi unitsinneqartussanngortinneqartut, namminerlu kajumissutsimik nuunneqartussat

- paarineqartussanngortinneqarnermi nalaani tarnikkut ataavartumik napparsimalersimasut

- inuusuttut 16-ileereersimasut, tarnikkullu nappaateqarnermut atatillugu nalilerneqarlutillu sullinneqartussat

Tusarfik: Kalaallit Nunaata Peqqinnissaqarfia Danmarkimilu Region Midtjyllandimi tarnikkut nappaatilinnut sullissiviup akornanni suleqatigiissut

Allisiguk

- Oqaluttuassatsialaavoq, ima paasillugu: Pingaarutilimmik suleqatigiilluarnerummat, taanna oqarpoq.

Else Søjmarkip oqarnera naapertorlugu uninngasunut immikkoortortami uninngasut inissat ukiup affaata kingulliup ingerlanerani 98-100 procentii atortarpaat.

Akia: 1,5 millionit koruunit ingerlanneqarneralu

Sanaqqiineq piviusunngorpat paasissutissat naapertorlugit 1,5 millionit koruuninik akeqassaaq.

Immikkoortortami uninngasinnaasut ataatsimik ilaneqarnerisigut sulisut taassuma saniatigut amerlineqassapput. Ullukkut unnukkullu sulisut tallimaniit arfinilinngussapput, unnuakkullu sulisut pingasuusartut sisamaata affanngussallutik.

Aningaasartuutit Kalaallit Nunaanni Peqqinnissaqarfimmit matussuserneqartassapput.

TV2 Østjylland Kalaallit Nunaanni Peqqinnissaqarfimmut tarnikkut nappparsimasunut immikkoortortap allilerneqarnissaanut kissaat pillugu tallimanngormat saaffiginnippoq.

Aamma atuarukOmbudsmandimit nalunaarusiap tarnikkut nappaatinik passussinermi ajornartorsiutit annertuut takutippai

Kalaallit Nunaanni Peqqinnissaqarfiup saaffiginnissut tigusimallugu uppernarsarpaa, tusagassiisarfimmullu ingerlateqqillugu. Taakkuali saaffiginnissummut suli akissuteqarsimanngillat.

Tarnikkut nappaatilinnut immikkoortortap allilerneqarnissaa, Region Midtjyllandimi tarnikkut nappaatilinnut isumaginninnermullu ataatsimiititaliami ilaasortanit akuersissutigeqqaarneqassaaq, suleqatigiinnissamullu isumaqatigiissut nutaaq ukioq manna septembarip aallaqqaataani atuutilissalluni.

Suliaq pillugu ataatsimiinnissamut paasissutissani tamanna takuneqarsinnaavoq.

Isumaqatigiissutip nutaap 2019-imi isumaqatigiissut kingoraassavaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.